వాహనదారులు తస్మాత్ జాగ్రత్త …!

దిశ, క్రైమ్ బ్యూరో: మీ వాహనాలపై కేసులు నమోదు అవుతున్నాయా.. అనవసరంగా ట్రాఫిక్ జరిమానాలు పడుతున్నాయా… అయితే మీ బండి నెంబర్ ప్లేట్ ట్రాఫిక్ నిబంధనలకు అనుగుణంగా ఉందో లేదో సరి చూసుకోండి. లేదంటే మీరు చిక్కుల్లో పడ్డట్టే. రోడ్లపై సరిగా లేని మన నంబర్ ప్లేట్ లను గమనిస్తున్న స్నాచర్లు అవే నంబర్ ప్లేట్ లతో దొంగతనాలకు పాల్పడుతున్నారు. దీంతో అసలు నంబర్ కలిగిన యజమానులకు కేసులు, ఫైన్‌లకు బలవుతున్నారు. అయితే, వాహనదారులు మీ మీ నంబర్ ప్లేట్లను సరి చూసుకొని.. సరి చేసుకోవాలని పోలీసులు కోరుతున్నారు. ఇటీవల అబిడ్స్‎లో ఓ యువతి రోడ్డుపై ఫోన్ మాట్లాడుతుండగానే బైక్ పై వచ్చిన అగంతకుడు ఖరీదైన సెల్ ఫోన్‎ను స్నాచింగ్ చేశాడు. దీంతో నగర పోలీస్ కమిషనర్ అంజనీ కుమార్ సరికాని నంబర్ ప్లేట్ కలిగిన వాహనాలపై కేసులు బుక్ చేసేందుకు ఆదేశాలు జారీ చేశారు. ఈ నేపథ్యంలో బుధవారం ఒక్క రోజే నగరంలో సరికాని నంబర్ ప్లేట్లకు సంబంధించి 876 కేసులు నమోదు చేసినట్టు సీపీ అంజనీకుమార్ గురువారం ఒక ప్రకటన లో తెలిపారు.