విషాదం.. చెరువులో మునిగి ఇద్దరు బాలికలు మృతి

దిశ, కుత్బుల్లాపూర్ : చేపల వేటకు వెళ్లిన ఇద్దరు బాలికలు ప్రమాదవశాత్తు చెరువులో మునిగి మృతి చెందారు. ఒకరి మృతదేహం లభించగా మరొకరి కోసం గాలిస్తున్నారు. ఈ విషాద ఘటన పేట్ బషీరాబాద్ పోలీస్ స్టేషన్ పరిధిలో చోటుచేసుకుంది.

ఎస్ఐ రాంబాబు తెలిపిన వివరాల ప్రకారం.. కుత్బుల్లాపూర్ నియోజకవర్గం దూలపల్లి వీకర్ సెక్షన్ కాలనీకి చెందిన సురేష్, సువర్ణ దంపతుల కుమార్తె సంజన(12), మరో బాలిక కరీనా(12) స్నేహితులు. వీరిద్దరూ కలిసి సోమవారం సాయంత్రం స్థానికంగా ఉన్న చెరువులో చేపల వేటకోసమని వెళ్లారు. ఈ క్రమంలో చెరువులో పడి ఓ బాలిక మునుగుతుండగా మరో బాలిక రక్షించబోయి అందులో పడిపోయింది. అది గమనించిన స్థానికులు.. గజ ఈతగాళ్లకు, పోలీసులకు సమాచారం అందించగా ఘటన స్థలానికి చేరుకున్నారు. అప్పటికే ఇద్దరు మునిగిపోగా సంజన మృతదేహాన్ని వెలుపలకు తీశారు. మరొక బాలిక కోసం గాలిస్తున్నారు. కేసు నమోదు చేసుకున్న పోలీసులు మృతదేహాన్ని పోస్టుమార్టం కోసం ఉస్మానియాకు తరలించారు.