రైతులపై ప్రేమ ఉంటే ధాన్యాన్ని మీరే కొనండి.. రేవంత్ ఫైర్

దిశ, డైనమిక్ బ్యూరో : కేంద్రం వరి కొనమని చెప్పిందని అందుకే యాసంగిలో ధాన్యం కొనుగోలు చేయమని సీఎం కేసీఆర్ తేల్చిచెప్పడం సరికాదని టీపీసీసీ చీఫ్ రేవంత్ రెడ్డి అన్నారు. కేంద్ర, రాష్ట్ర ప్రభుత్వాలు రైతుల జీవితాలతో ఆటలాడుతున్నాయని ఆరోపించారు. పార్లమెంట్ శీతాకాల సమావేశాలకు ఢిల్లీకి వెళ్లిన రేవంత్ రెడ్డి మీడియాతో మాట్లాడారు. తెలంగాణ రైతుల సంక్షేమం కోసం ధాన్యాన్ని రాష్ట్రం కొనాలని డిమాండ్ చేశారు. రైతు వ్యతిరేక చట్టాలను తీసుకురావడంతో 750 మంది రైతులు చనిపోయారని వారి చావుకు ప్రధాని మోడీనే కారణమన్నారు.

రైతుల కోసం ప్రాజెక్టులు నిర్మించామని చెప్పే కేసీఆర్ ప్రభుత్వం.. ధాన్యం కొనలేదా అని ప్రశ్నించారు. పండించిన పంటను కొనలేకపోతే ఇక ప్రాజెక్టులెందుకని విమర్శించారు. రాష్ట్ర ప్రభుత్వానికి వ్యవసాయంపై పాలసీ అనేది లేనట్టు ఉందని ఆరోపించారు. నిజామాబాద్ రైతులకు పసుపు బోర్డు ఇవ్వకుండా బీజేపీ మోసం చేసింది, షుగర్ ఫ్యాక్టరీ మూసేసి కేసీఆర్ నష్టం చేశారని రేవంత్ ఎద్దేవ చేశారు.