మొదటిసారి ఈడీ విచారణకు దగ్గుబాటి రానా.. పార్టీలో డ్రగ్స్ సరఫరాపై ఆరా

దిశ, వెబ్‌డెస్క్: టాలీవుడ్ డ్రగ్స్ కేసు రోజురోజుకు ఉత్కంఠను రేపుతోంది. ఈ డ్రగ్స్ కేసులో ప్రధాన నిందితుడు కెల్విన్ ఇచ్చిన సమాచారం మేరకు మరోసారి సినీ ప్రముఖులను ఈడీ విచారిస్తున్న సంగతి తెలిసిందే. ఇప్పటికే దర్శకుడు పూరి జగన్నాధ్, నటి ఛార్మి, రకుల్ ప్రీత్ సింగ్, నటుడు నందు విచారణకు హాజరైన విషయం తెలిసిందే. ఇక తాజాగా హీరో రానా దగ్గుబాటి బుధవారం ఈడీ ముందు హాజరయ్యారు. కొద్దిసేపటి క్రితమే ఈడీ ఆఫీస్ కి చేరుకున్న రానాను అధికారులు ప్రశ్నించనున్నారు.

గతంలో 2017లో జరిపిన ఎక్సైజ్‌ విచారణలో రానా, రకుల్‌ల పేర్లు తెరపైకి రాలేదు. అయితే ఈసారి కెల్విన్ డేటాలో రానా, రకుల్ పేర్లు ఉండడంతో వారికి సమన్లు జారీచేసిన అధికారులు విచారణకు రావాలని కోరడంతో రానా మొదటిసారి సినీతారల డ్రగ్స్ కేసులో విచారణను ఎదుర్కొంటున్నారు. మనీలాండరింగ్‌ వ్యవహారంలో రానాను విచారించనున్నారు. ఎఫ్ కేఫ్ తో రానా ఆర్థిక లావాదేవీలు జరిపినట్లు ఆరోపణలు ఎదుర్కోవడంతో వాటిపై కూడా ఈడీ విచారించనుంది. గతంలో F- కేఫ్ లాంజ్ లో రానా, రకుల్, నవదీప్, రవితేజ పార్టీ జరుపుకున్నట్లు, ఆ పార్టీలోనే డ్రగ్స్ సరఫరా జరిగినట్లు ఆరోపణలు వినిపించాయి. ఈ విచారణలో F- కేఫ్ లాంజ్ కీలకంగా మారింది.