ఫోన్‌ మాట్లాడుతూ బావిలో పడ్డ వ్యక్తి

దిశ, వెబ్‌డెస్క్ : ఫోన్ మాట్లాడుతూ ఓ వ్యక్తి బావిలో పడిన ఘటన చిత్తూరు జిల్లా పలమనేరులో చోటు చేసుకుంది. వివరాల ప్రకారం.. పలమనేరులోనికి చెందిన చంద్రశేఖర్ అనే వ్యక్తి ఫోన్ మాట్లాడుతూ వెళ్తున్నాడు. అయితే తాను వెళ్తున్న దారిలో ఓ పాడుపడిన బావి ఉంది. దాన్ని గమనించని చంద్రశేఖర్ ఫోన్ మాట్లాడుతూ వెళ్లి సుమారు 60 అడుగుల లోతున్న పాడుపడిన బావిలో పడిపోయాడు. సమీపంలో ఎవరూ లేకపోవడంతో అతను 17 గంటలు బావిలోనే ఉండిపోయాడు. ఈత రావడంతో బావిలోంచి దరికి చేరి రెండు చెట్టుకొమ్మలు పట్టుకోని తన ప్రాణాలను కాపాడుకున్నాడు చంద్రశేఖర్. శుక్రవారం ఉదయం 10 గంటల సమయంలో అటుగా వచ్చిన పశువుల కాపరికి కేకలు వినిపించడంతో బావిలో ఓ వ్యక్తి పడినట్లు గమనించి పోలీసులకు సమాచారం అందించారు. సమాచారం అందుకున్న పోలీసులు, ఫైర్ సిబ్బందిని తీసుకొని ఘటనా స్థలానికి చేరుకుని మూడు గంటలు శ్రమించి చంద్రశేఖర్‌ను రక్షించారు.