బిల్డింగ్ పై నుండి పడి బాలుడు మృతి 

సికింద్రాబాద్ బోయిన్ పల్లిలో ప్రమాదవశాత్తూ బాలుడు బిల్డింగ్ పై నుండి కింద పడి మృతి చెందిన ఘటన అల్వాల్ పోలీస్ స్టేషన్ పరిధిలో చోటు చేసుకుంది. అంజయ్య నగర్ లో నివాసం ఉంటున్న పరశురామ్ అనే 13 ఏళ్ల బాలుడు అపార్ట్మెంట్ లోని రెండవ అంతస్తులో ఆడుకుంటుండగా ప్రమాదవశాత్తు జారి కింద పడి మృతి చెందినట్లు పోలీసులు తెలిపారు. గత కొన్ని రోజుల క్రితం ఇప్పుడు చనిపోయిన బాలుడికి, అతని తల్లికి రోడ్డు ప్రమాదం జరిగినట్లు పోలీసులు వెల్లడించారు.

ఈ క్రమంలో బాలుడి తల్లిని అతని తండ్రి స్వగ్రామానికి తీసుకెళ్ళి వైద్యం అందించినట్లు పోలీసులు తెలిపారు. అయితే బాలుడిని మాత్రం అంజయ్య నగర్ లో నివాసం ఉంటున్న సోదరుని వద్ద వదిలి పెట్టి వెళ్లినట్లు పోలీసులు తెలిపారు. బాలుడు ఆడుకుంటున్న సమయంలో ప్రమాదవశాత్తు జారి కింద పడడంతో వెంటనే సికింద్రాబాద్ సన్ షైన్ ఆసుపత్రికి తరలించి చికిత్స అందించగా… చికిత్సపొందుతూ బాలుడు చనిపోయినట్లు పోలీసులు పేర్కొన్నారు. పరశురాం తలకు తీవ్ర గాయాలు కావడంతో మృతి చెందినట్లు పోలీసులు తెలియజేశారు. పోస్టుమార్టం నిమిత్తం బాలుడి మృతదేహాన్ని ఉస్మానియా మార్చురీకి తరలించి, కేసు నమోదు చేసుకుని దర్యాప్తు చేస్తున్నట్లు తెలిపారు.