చంద్రబాబు పారిపోవడం ఖాయం.. ఎమ్మెల్యే జోగి రమేష్‌ ఫైర్

దిశ, ఏపీ బ్యూరో : తెలుగుదేశం పార్టీ అధినేత చంద్రబాబు నాయుడు తలకిందులుగా తపస్సు చేసినా రాష్ట్ర ప్రజలు ఆయనను నమ్మరని ఎమ్మెల్యే జోగి రమేష్‌ చెప్పుకొచ్చారు. వైసీపీకి ప్రజాదరణ ఉండటాన్ని తట్టుకోలేకపోతున్న చంద్రబాబు ఎల్లోమీడియాను అడ్డుపెట్టుకొని ప్రభుత్వంపై దుష్ప్రచారం చేస్తున్నారని మండిపడ్డారు. వచ్చే ఎన్నికల్లో టీడీపీ ఒక్క స్థానంలో కూడా గెలవదని చెప్పుకొచ్చారు. రాబోయే రెండేళ్లలో చంద్రబాబు రాజకీయాల నుంచి పారిపోవడం ఖాయమన్నారు. తాడేపల్లిలోని వైసీపీ కేంద్ర కార్యాలయంలో శనివారం ఎమ్మెల్యే జోగి రమేష్ మీడియాతో మాట్లాడారు.

టీడీపీ బతికే ఉందని.. పార్టీ శ్రేణులను మభ్యపెట్టేందుకు చంద్రబాబు ప్రయత్నాలు చేస్తున్నారన్నారు. టీడీపీ హయాంలో జన్మభూమి కమిటీల పేరుతో నేతలు పందికొక్కుల మాదిరిగా దోచుకుతిన్నారని.. రేపు మళ్లీ అధికారంలోకి వస్తే టీడీపీ నేతలకు దోచి పెట్టేందుకు సిద్ధమయ్యారంటూ విమర్శలు చేశారు. చంద్రబాబు ఎన్ని వేషాలు వేసినా, తలక్రిందులుగా తపస్సు చేసినా, పొర్లు దండాలు పెట్టినా.. లెంపలేసుకొని ఊరువాడ తిరిగినా కూడా ఆయన్ను రాష్ట్ర ప్రజలు నమ్మరంటే నమ్మరని చెప్పుకొచ్చారు. చంద్రబాబు నరరూప రాక్షసుడని, రాజకీయం కోసం ఎంతకైనా దిగజారతాడని ప్రజలకు అర్థమైందన్నారు. చచ్చిపోయిన టీడీపీని బతికించుకునేందుకు ఎల్లోమీడియాను అడ్డుపెట్టుకుని ప్రభుత్వంపై విమర్శలు చేస్తున్నారని విరుచుకుపడ్డారు. వచ్చే ఎన్నికల్లో టీడీపీకి 160 సీట్లు వస్తాయని అచ్చెన్నాయుడు అనడం హాస్యాస్పదమన్నారు. మరోవైపు అయ్యన్నపాత్రుడు పొద్దున లేచింది మొదలు తాగి ఊగుతున్నారు. ప్రభుత్వాన్ని తిట్టడమే పనిగా పెట్టుకున్నారు. టీడీపీ నేతలు నోరు జాగ్రత్తగా పెట్టుకోవాలని, ప్రభుత్వంపై అవాకులు, చవాకులు మాట్లాడితే సహించేది లేదని ఎమ్మెల్యే జోగి రమేష్‌ వార్నింగ్ ఇచ్చారు.