ఆర్సీబీ ఫ్యాన్స్‌కు స్పిన్నర్ చాహల్ అదిరిపోయే కౌంటర్

బెంగళూరు: రాయల్ ఛాలెంజర్స్ బెంగళూరు జట్టు అభిమానులకు స్పిన్నర్ యుజువేంద్ర చాహల్ అదిరిపోయే కౌంటర్ ఇచ్చారు. ఐపీఎల్ వేలం సమయంలో ఆర్సీబీ యజమాన్యం తనకు అధికంగా రూ.6.5 కోట్లు చెల్లిస్తేనే జట్టుతో కొనసాగుతానని చాహల్ బ్లాక్ మెయిలింగ్ చేసినట్టు ఫ్యాన్స్ ఆరోపించడంతో పాటు అతనిపై విమర్శించడం మొదలెట్టారు. తాజాగా దీనిపై స్పందించిన చాహల్ ఫ్యాన్స్‌కు అదిరిపోయే సమాధానమిచ్చారు. 'నేను ఎవరినీ ఎక్కువ డబ్బులు డిమాండ్ చేయలేదు. వేలానికి ముందు ఆర్సీబీ డైరెక్టర్ మైక్ హెసన్ నాకు కాల్ చేశాడు.

జట్టు రిటెన్షన్‌లో మూడు స్లాట్స్ మాత్రమే ఉన్నాయి. వాటిని విరాట్, మ్యాక్స్‌వెల్, సిరాజ్ కోసం కేటాయించినట్టు చెప్పాడు. కనీసం నన్ను వేలంలో తిరిగి కొనుగోలు చేస్తామని కూడా చెప్పలేదు. నేను ఆర్సీబీతోనే కొనసాగుతానని, ఇతర జట్టుకు వెళ్లాల్సి వస్తుందని ఎప్పుడూ అనుకోలేదు. 2010లో నా కెరీర్ ప్రారంభంలో ఆడిన రాజస్థాన్ రాయల్స్ జట్టుకు తిరిగి చేరుకోవడం సంతోషంగా ఉంది'. అని చాహల్ చెప్పుకొచ్చాడు. కాగా, ఐపీఎల్-2022 వేలంలో యుజువేంద్ర చాహల్‌ను రాజస్థాన్ రాయల్స్ జట్టు రూ.6.5 కోట్లకు కొనుగోలు చేసిన విషయం తెలిసిందే.