జీవి పుట్టుక, ఏలియ‌న్ల జాడ తెలిపే ఉప్పు నీటి కొల‌ను క‌నుగొన్న సైంటిస్ట్‌లు!

దిశ‌, వెబ్‌డెస్క్ః భూమిపైనున్న మ‌హాస‌ముద్రంలో ఎన్నో వింత‌లు, అంత‌కుమించిన ర‌హ‌స్యాలు దాగున్నాయి. జీవికి ప్రాణ‌వాయువు ఎంతో ముఖ్య‌మో అంతే ముఖ్య‌మైన నీటిలోనే జీవి ఉద్భ‌వించిందని శాస్త్ర‌వేత్త‌ల న‌మ్మ‌కం. అందుకే, గ్ర‌హాంత‌రాల్లో నీటి జాడను క‌నుక్కోడానికి తీవ్రంగా కృషి చేస్తున్నారు. ఇక‌, భూమిపైనున్న‌ ఎర్ర సముద్రంలో కనిపించే అరుదైన లోతైన సముద్రపు ఉప్పునీటి కొలనుల్లో ఎన్నో అద్భుత విశేషాల‌ను తెలుసుకున్న ప‌రిశోధ‌కులు, భూమిపైన‌ జీవితం ప్రారంభానికి సంబంధించిన అంతర్దృష్టిని అందించే ఆ నీటి కొల‌నుల‌పై మ‌రింత అధ్య‌య‌నం చేస్తున్నారు. ఇటీవలి పరిశోధనల ప్రకారం, ఈ ప్రాంతంలో దీర్ఘకాలిక పర్యావరణ మార్పులపై సమాచారాన్ని కూడా అందించవచ్చని తెలుసుకున్నారు.

అరుదుగా, చిన్న పరిమాణంలో ఉన్నప్పటికీ, ఈ ఉప్పునీటి కొలనులు సముద్రంలో తక్కువ జీవ‌రాశి ఉన్న అత్యంత‌ దిగువ భాగంలో "స్థూల, సూక్ష్మజీవుల" జీవవైవిధ్యపు ఒయాసిస్‌గా పేరొందాయి. మియామి విశ్వవిద్యాలయంలో మెరైన్ జియోసైన్సెస్ విభాగంలో ప్రొఫెసర్, చైర్‌గా ఉన్న సామ్ పుర్కిస్, ఈ పరిశోధనకు ప్రధాన రచయితగా వ్య‌వ‌హ‌రించారు. లైవ్ సైన్స్‌తో మాట్లాడుతూ, "మన ప్రస్తుత అవగాహన ఏంటంటే, భూమిపైన‌ జీవం లోతైన సముద్రంలో ఉద్భవించింది అని. అయితే, ఈ కొల‌నుల్లో దాదాపు ఖచ్చితంగా క‌ణజాలాల్లో ఆక్సిజ‌న్ లేకుండా ఉన్న జీవులు కూడా జీవిస్తున్నాయి" అన్నారు.

ఇక‌, లోతైన సముద్రపు ఉప్పునీటి కొలనులు గొప్ప శాస్త్రీయ ఆసక్తిని కలిగి ఉన్నాయని, ఎందుకంటే అవి భూమిపై అత్యంత తీవ్రమైన నివాస వాతావరణాల్లో ఒకటిగా ఉన్నాయని ఆయన తెలిపారు. "ఆక్సిజన్, హైపర్‌సలైన్ లేనప్పటికీ, అవి 'ఎక్స్‌ట్రెమోఫైల్' సూక్ష్మజీవులు అని పిలిచే ఉన్న‌త‌ సంఘంతో నిండి ఉన్నాయని పేర్కొన్నారు. ఈ సంఘాన్ని అధ్యయనం చేయడం వల్ల‌ మన గ్రహం మీద జీవం మొదట కనిపించిన పరిస్థితులకు సంబంధించి, ప్రాథ‌మిక విష‌యాల‌ను అర్థం చేసుకోవ‌చ్చ‌ని తెలిపారు. సైన్స్ జర్నల్ నేచర్‌లో ప్రచురించిన పరిశోధన ప్రకారం, ఇవి విశ్వంలో ఎక్కడైనా "ఇతర నీటి ప్రపంచాలపై" జీవం కోసం వేటను నిర్దేశించగలవని, ఉప్పునీటి కొలనుల్లో అక్కడ కనిపించే "అద్భుతమైన చెక్కుచెదరని" అవక్షేపాలు వరదలు, సునామీలను అంచనా వేయడంలో కూడా సహాయపడతాయని అన్నారు.