ఊస‌ర‌వెల్లి కాదు, పిట్ట మారుస్తున్న రంగులు.. మెస్మ‌రైజింగ్ వీడియో!

దిశ‌, వెబ్‌డెస్క్ః ఊస‌రవెల్లి రంగులు మార్చ‌డం చాలా మందికి తెలుసు, చూసుంటాము. కొన్ని ప‌క్షుల్లోనూ ఇలా రంగులు మార‌తాయని కొంద‌రికి తెలిసుండొచ్చు. అయితే, ఓ చిన్న హ‌మ్మింగ్ బ‌ర్డ్ మార్చే రంగుల్ని చూస్తే మాత్రం అద్భుతంగా ఉంటుంది. ఇంటర్నెట్‌లో వైరల్ అవుతున్న ఈ వీడియోలో హమ్మింగ్‌బర్డ్ రంగును మారుస్తూ క‌నిపిస్తుంది. అందులోనూ ఒక వ్య‌క్తి వేలిపై వాలి ఇలా రంగులు మార్చుతుంటే చాలా అందంగా క‌నిపిస్తుంది. వైరల్ హాగ్ ఖాతాలో షేర్ చేసిన ఈ క్లిప్‌లో హమ్మింగ్ బర్డ్‌ ముదురు ఆకుపచ్చ నుండి నలుపుకు, గులాబీ రంగుకు మారుతుంటుంది. పక్షి తన తలను వేర్వేరు దిశల్లో తిప్పినప్పుడు ఈ రంగు మారడం చూడొచ్చు. ఈ వీడియో యూట్యూబ్ నుండి అనేక సోషల్ మీడియా ప్లాట్‌ఫారమ్‌లల్లో షేర్ చేశారు.

కాగా, సైన్స్ డైలీ ప్రకారం, హమ్మింగ్‌బర్డ్‌లు మొత్తం ప్రపంచంలో అత్యంత ముదురు రంగులో ఉండే జంతువుల‌ల్లో ఒక‌టిగా ఉన్నాయి. ఈ పిట్ట రెక్క‌ల్లో రెయిన్‌బో రంగులు, వాటి ఈకలలోని పాన్‌కేక్ ఆకారపు నిర్మాణాల నుండి వస్తాయని నిపుణులు వివరించారు. పక్షి తన తలను వేర్వేరు దిశల్లోకి తిప్పినప్పుడు, రంగుల ఈక‌ల‌ ప్రత్యేక ఆకృతిలోని కాంతి ఇంద్రధనస్సును ప్రతిబింబించేలా చేస్తుందని ప‌రిశోధ‌క వ్యాసంలో పేర్కొన్నారు.