న్యూఢిల్లీ: టీమిండియా మాజీ కెప్టెన్ విరాట్ కోహ్లీ టీ20లలో మూడో స్థానంలో బ్యాటింగ్ చేస్తాడని, అతని స్థానాన్ని ఇతర ఆటగాళ్లతో భర్తీ చేయడం సాధ్యపడదని మాజీ క్రికెటర్ సునీల్ గవాస్కర్ అభిప్రాయం వ్యక్తం చేశారు. శ్రీలంకతో జరిగిన టీ20 సిరీస్‌లో శ్రేయస్ అయ్యర్ కోహ్లీ స్థానంలో బ్యాటింగ్‌కు దిగి అద్భుత ప్రదర్శన చేశాడు. మూడు మ్యాచుల్లో ఏకంగా 204 పరుగులు రాబట్టాడు.
అయితే, ప్రస్తుతం కోహ్లీ హాలిడేలో ఉన్నందున మూడో స్థానంలో అయ్యర్ బ్యాటింగ్‌కు వచ్చాడు. సెలవులు పూర్తయ్యాక కోహ్లీ తిరిగి మూడో స్థానంలోనే బ్యాటింగ్‌కు వస్తాడని.. అప్పుడు అయ్యర్ నాలుగు లేదా ఐదో స్థానంలో సూర్యకుమార్ యాదవ్‌తో కలిసి ఆడొచ్చని గవాస్కర్ వెల్లడించాడు. టాప్ బ్యాటింగ్ లైనప్‌తో పాటు బెస్ట్ బౌలర్లతో టీమిండియా జట్టు మైదానంలోకి అడుగుపెడుతుందని ఆయన తెలిపారు.