కృష్ణవంశీ కోసం మెగాస్టార్ ఎక్స్‌పరిమెంట్..

దిశ, సినిమా : ప్రస్తుతం కుర్ర హీరోలతో పోటీపడుతున్న మెగాస్టార్ చిరంజీవి వరుస చిత్రాలతో బిజీగా ఉన్న సంగతి తెలిసిందే. ఇటు తన ప్రాజెక్ట్స్‌తో బిజీగా ఉంటూనే ఇతర చిత్రాల ప్రమోషన్‌కు కూడా తన వంతు సాయం చేస్తున్నారు చిరు. ఇదిలా ఉంటే.. క్రియేటివ్ డైరెక్టర్ కృష్ణవంశీ 'రంగమార్తాండ' టైటిల్‌తో తెరకెక్కించిన చిత్రానికి మెగాస్టార్ వాయిస్ ఓవర్ ఇవ్వనున్నారు. గతంలో ఆయన పలు సినిమాలకు తన గాత్రాన్ని అందించినప్పటికీ.. ఇది మాత్రం వాటన్నింటికీ భిన్నంగా ఉండబోతుందని తెలుస్తోంది.

చిరు ఈ చిత్ర కథను షాయరీస్(పాట, డైలాగ్.. రెండింటి సమ్మేళనం) రూపంలో చెప్పనున్నారట. కృష్ణవంశీ చెప్పిన ఆలోచన చిరుకు నచ్చడంతో వెంటనే ఆమోదం తెలిపాడని తెలుస్తోంది. ప్రేక్షకులకు కూడా డిఫరెంట్ ఎక్స్‌పీరియన్స్ అందిస్తుందని సినీ వర్గాలు అభిప్రాయపడుతున్నాయి. త్వరలోనే ఈ సినిమా విడుదల తేదీ వివరాలు ప్రకటించే అవకాశం ఉంది. ఇక ప్రకాష్ రాజ్ లీడ్ రోల్ పోషించిన ఈ చిత్రంలో రమ్యకృష్ణ, శివాత్మిక రాజశేఖర్, అనసూయ, అలీ రెజా, రాహుల్ సిప్లిగంజ్ తదితరులు కీలక పాత్రల్లో కనిపించనున్నారు.