ఆ అవకాశాన్ని వదులుకునే ప్రసక్తే లేదంటున్న నాగార్జున

దిశ, సినిమా : తెలుగు బిగ్ బాస్ 'సీజన్ 6' ప్రారంభానికి సిద్ధంగా ఉంది. తొలి రెండు సీజన్లకు స్టార్ హీరోలు ఎన్టీఆర్, నాని తమ హోస్టింగ్‌తో అలరించగా.. ఆ తర్వాతి సీజన్ నుంచి కింగ్ నాగార్జున ఆ బాధ్యతలు నిర్వర్తిస్తున్న సంగతి తెలిసిందే. ఇదిలా ఉంటే.. 'బిగ్ బాస్' లేటెస్ట్ ఎడిషన్‌ హోస్ట్ చేసేందుకు నాగార్జున సుముఖంగా లేరని కొంతకాలంగా పుకార్లు వినిపిస్తున్నాయి.

ఈ నేపథ్యంలో హోస్టింగ్ నుంచి ఆయన తప్పుకుంటారని చాలా మంది భావించినప్పటికీ వదులుకునే చాన్స్ లేదని స్పష్టం చేశాడు నాగ్. రీసెంట్‌గా ఈ అక్కినేని సీనియర్ హీరో బిగ్ బాస్ తెలుగు ఓటీటీకి కూడా హోస్ట్‌‌గా వ్యవహరించగా.. ఇప్పుడు 'బిగ్ బాస్ 6' కోసం మరోసారి ప్రేక్షకులకు ముందుకు రాబోతున్నాడు. ఇప్పటికే కంటెస్టెంట్ల జాబితా సిద్ధమవుతుండగా.. ఈసారి మరింత కొత్తగా షో హోస్ట్ చేసేందుకు నాగార్జున సిద్ధంగా ఉన్నట్లు తెలుస్తోంది. ఈ మేరకు లుక్‌తో పాటు హోస్టింగ్ స్టైల్‌ కూడా మార్చుకోనున్నట్లు సమాచారం.