తాబేలుపై ఎక్కిన ఎలుక.. తీరా ఏం చేసిందంటే..

దిశ, ఫీచర్స్ : ప్రస్తుతం సోషల్ మీడియా ప్రతి ఒక్కరికీ చేరువైనందున.. ఏ చిన్న విషయమైనా ఇట్టే వైరల్ అయిపోతోంది. ఇక జంతువులకు సంబంధించిన వీడియోల గురించి అయితే ప్రత్యేకంగా చెప్పనవసరం లేదు. నిత్యం ఏదో ఒక వీడియో నెట్టింట హల్ చల్ చేస్తూనే ఉంటుంది. అందులో కొన్ని వీడియోలు ఫన్నీగా అనిపిస్తే.. మరికొన్ని ఆశ్చర్యాన్ని కలిగిస్తాయి. తాజాగా తాబేలు, ఎలుకకు సంబంధించిన అలాంటి వీడియో ఒకటి వైరల్‌గా మారింది.

మనుషులు లేదా ఇంకేవైనా జంతువులను చూస్తే కనిపించకుండా పారిపోయే ఎలుక.. తాబేలుపై స్వారీ చేస్తూ నెటిజన్లను ఆశ్చర్యానికి గురిచేసింది. సదరు ఎలుక తాబేలుపై కూర్చుని అటు ఇటు చూస్తుండగా.. తాబేలు కూడా స్వేచ్ఛగా, హాయిగా నడుచుకుంటూ వెళ్తున్న సన్నివేశాన్ని వీడియోలో చూడవచ్చు. ఇక ఈ వైరల్ వీడియో చూసి నెటిజన్లు కామెంట్ల వర్షం కురిపిస్తున్నారు. ఆ రెండింటిలో ఒకటి 'టాక్సీ డ్రైవర్' అని ఒకరంటే.. మరొకరు ఫ్రీ రైడ్ ఎవరికి ఇష్టం ఉండదు' అంటూ ఫన్నీగా వ్యాఖ్యానిస్తున్నారు.