TS Elections : జనగామ పోలింగ్ కేంద్రం వద్ద హైటెన్షన్!
జ‌న‌గామ‌లో 244 పోలింగ్ కేంద్రం వద్ద బీఆర్ఎస్, బీజేపీ నేత‌లు ఘర్షణకు దిగ‌డంతో ఉద్రిక్తత నెల‌కొంది.
దిశ, వ‌రంగ‌ల్ బ్యూరో : జ‌న‌గామ‌లో 244 పోలింగ్ కేంద్రం వద్ద బీఆర్ఎస్, బీజేపీ నేత‌లు ఘర్షణకు దిగ‌డంతో ఉద్రిక్తత నెల‌కొంది. ప‌ట్టణంలోని ప్రభుత్వ ఉన్నత పాఠ‌శాల‌లో ఏర్పాటు చేసిన 244 పోలింగ్ కేంద్రంలో ఓటింగ్ స‌ర‌ళిని ప‌రిశీలించేందుకు బీఆర్ఎస్ అభ్యర్థి ప‌ల్లా రాజేశ్వర్ రెడ్డితో పాటు ఆయ‌న వెంట కొంత‌మంది నేత‌లు వెళ్లడంపై అక్కడికి చేరుకున్న బీజేపీ అభ్యర్థి ద‌శ‌మంతరెడ్డి అభ్యంత‌రం వ్యక్తం చేశారు.
పాసుల్లేకుండా ఇష్టారాజ్యంగా ఎలా లోప‌లికి వెళ్తారంటూ బీజేపీ నేత‌లు ప్రశ్నించారు. అదే స‌మ‌యంలో మీరు పాస్‌ లేకుండానే వ‌చ్చారుగా అంటూ బీఆర్ఎస్ నేత‌లు వాగ్వాదానికి దిగ‌డంతో దూష‌ణ‌లు మొద‌ల‌య్యాయి. నేత‌ల మ‌ధ్య నెల‌కొన్న వాగ్వాదం కాస్త ఘర్షణకు దారితీసింది. దీంతో పోలీసులు స్వల్ప లాఠీచార్జి చేసి కార్యకర్తలను చెద‌ర‌గొట్టారు. అలాగే కొంత‌మంది ఆందోళ‌న‌కారుల‌ను సైతం అదుపులోకి తీసుకున్నట్లుగా తెలుస్తోంది.