ఘనంగా జరుగుతున్న ఐదవ రోజు.. అట్ల బతుకమ్మ వేడుకలు

దిశ, వెబ్ డెస్క్ : తెలంగాణ వ్యాప్తంగా బతుకమ్మ సంబరాలు ఘనంగా జరుగుతున్నాయి. కాగా తొమ్మిదిరోజుల బతుకమ్మ వేడుకల్లో నేడు ఐదవ రోజును అట్ల బతుకమ్మగా తెలంగాణ మహిళలు సంబురంగా జరుపుకుంటున్నారు. ఈ ఐదవ రోజున బతుకమ్మకు నైవేద్యంగా అట్లు సమర్పిస్తారు. ఉప్పుడు బియ్యం నానబోసి, వాటిని రుబ్బి అట్లు పోసి.. బతుకమ్మల వద్ద నైవేద్యంగా పెడతారు. సాయంత్రం నుండి రాత్రి వరకు ఆడపడుచులు తెలంగాణ సంస్కృతికి అద్దం పట్టేలా పాటలు పాడుకుంటూ బతుకమ్మ ఆడి, ఆ అట్లను ఒకరికి ఒకరు వాయినంగా ఇచ్చుకుంటారు. ఇక ఐదవ రోజున కొన్ని ప్రాంతాల్లో బతుకమ్మను ఐదు అంతస్తుల్లో పేర్చుతారు. ఇక రేపు ఆరవ రోజున అర్రెం బతుకమ్మ అంటారు. అంటే రేపు బతుకమ్మ అలిగిన రోజుగా చెప్పుకొని, బతుకమ్మ ఆడరు.