తెలంగాణలో టీడీపీ బలోపేతంపై త్వరలో యాక్షన్ ప్లాన్: చంద్రబాబు

దిశ, వెబ్ డెస్క్: తెలంగాణ పార్టీ బలోపేతంపై టీడీపీ అధినేత, ఏపీ సీఎం చంద్రబాబునాయుడు ఫోకస్ పెట్టారు. ఇందులో భాగంగా హైదరాబాద్ ఎన్టీఆర్ భవన్‌లో తెలంగాణ టీడీపీ ముఖ్యనేతలతో సమావేశం నిర్వహించారు. ఈ సందర్భంగా చంద్రబాబు మాట్లాడుతూ తెలుగుదేశం పార్టీ హైదరాబాద్‌లో పుట్టిందన్న విషయాన్ని గుర్తు చేశారు. తెలుగు జాతి కోసమే ఆనాడు ఎన్టీఆర్ తెలుగుదేశం పార్టీ పెట్టారని తెలిపారు. ఉమ్మడి రాష్ట్రంలో తెలంగాణ ప్రాంతాన్ని చాలా అభివృద్ధి చేశామని చెప్పారు. రాష్ట్ర విభజన తర్వాత ప్రత్యేక పరిస్థితుల్లో తెలంగాణ టీడీపీ అధ్యక్షుడిని పెట్టలేదన్నారు. అలాగే తెలంగాణలో జరిగిన అసెంబ్లీ, ఎంపీ ఎన్నికల్లో పోటీ చేయలేదని చెప్పారు. పార్టీ బలోపేతంపై త్వరలో యాక్షన్ ప్లాన్ రెడీ చేస్తామన్నారు. కార్యకర్తల మనోభావాల ప్రకారమే పార్టీని ప్రజల్లోకి తీసుకెళ్తామని చంద్రబాబు పేర్కొన్నారు.