సనాతన సాహిత్యం.. గోండు భాషలో భారతం.. మాజీ ఉపరాష్ట్రపతి ఆసక్తికర ట్వీట్

దిశ, డైనమిక్ బ్యూరో: మాజీ ఉపరాష్ట్రపతి వెంకయ్య నాయుడు ఎక్స్ వేదికగా ఆసక్తికర ట్వీట్ చేశారు. మహాభారతాన్ని గోండు భాషలోకి అనువదించి "పండోక్న మహాభారత్ కథ" పేరిట పుస్తకంగా తీసుకొచ్చిన తొడసం కైలాస్, మంగళవారం హైదరాబాద్ లోని తన నివాసానికి వచ్చి, పుస్తకాన్ని అందజేశారని పేర్కొన్నారు. ఈ సందర్భంగా వారిని అభినందించానని తెలిపారు. భవిష్యత్తులో భారతీయ సనాతన సాహిత్యం విషయంలో ఈ ప్రయత్నం కొనసాగించాలని సూచించానని తెలిపారు.

ఉపాధ్యాయుడిగా పని చేస్తున్న కైలాస్, గిరిజనులకు మహాభారతాన్ని చేరువ చేసేందుకు గోండు భాషలో రచించి చేసిన ప్రయత్నం అభినందనీయమైనదని పేర్కొన్నారు. ఏ విషయమైనా మాతృభాషలో తెలుసుకుంటే అది మనసుకు హత్తుకుంటుందని వివరించారు. ఈ చొరవ ద్వారా భవిష్యత్ తరాలకు మహాభారతం మరింత చేరువ కావాలని ఈ సందర్భంగా ఆకాంక్షించారు.