KTR: కర్ణాటక వాల్మీకి కుంభకోణంలో తెలంగాణ నేతల పాత్ర
కర్ణాటకలోని వాల్మీకి ఆదివాసీ అభివృద్ధి కార్పొరేషన్‌లో జరిగిన కుంభకోణం దేశ వ్యాప్తంగా దుమారం రేపిన సంగతి తెలిసిందే.
దిశ, వెబ్‌డెస్క్: కర్ణాటకలోని వాల్మీకి ఆదివాసీ అభివృద్ధి కార్పొరేషన్‌లో జరిగిన కుంభకోణం దేశ వ్యాప్తంగా దుమారం రేపిన సంగతి తెలిసిందే. వాల్మీకి కార్పొరేషన్ అకౌంట్స్ సూపరింటెండెంట్ చంద్రశేఖరన్ ఆత్మహత్య తర్వాత ఈ కుంభకోణం వెలుగులోకి వచ్చింది. తాజాగా స్కామ్‌పై బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ కీలక ఆరోపణలు చేశారు. ఈ మేరకు సోషల్ మీడియా(ఎక్స్) వేదికగా ఆసక్తికర పోస్టు పెట్టారు. కర్ణాటక వాల్మీకి స్కామ్‌తో రాష్ట్ర నేతలు, వ్యాపార వేత్తలకు లింకులు ఉన్నాయని ఆరోపించారు. కర్ణాటక ఎస్టీ కార్పొరేషన్ నుంచి రాష్ట్రానికి రూ.45 కోట్లు బదిలీ అయ్యాయని అన్నారు. పార్లమెంట్ ఎన్నికల సమయంలో ఆ రూ.45 కోట్ల నగదు డ్రా చేసిన బార్లు, బంగారు దుకాణాదారులు ఎవరు? అని ప్రశ్నించారు. ఆ బార్లు, బంగారు దుకాణాదారులతో కాంగ్రెస్ నేతలకు ఉన్న సంబంధం ఏంటో తెలియాలని డిమాండ్ చేశారు.
హైదరాబాద్‌లోని 9 మంది బ్యాంకు ఖాతాలకు రూ.45 కోట్లు కర్ణాటక నుంచి బదిలీ అయ్యారని వెల్లడించారు. అంతేకాదు.. ఈ వాల్మీకి స్కామ్‌కు సంబంధించి తెలంగాణలోనూ సిట్, సీఐడీ, ఈడీ సోదాలు జరిగాయని గుర్తుచేశారు. దర్యాప్తు సంస్థల సోదాల వార్తలను బయటకు రానివ్వకుండా జాగ్రత్త పడ్డారని అన్నారు. ‘‘మొత్తం రూ.95 కోట్ల అవినీతి జరిగిందని సీఎం కర్ణాటక అసెంబ్లీలో ప్రకటించారు. సిద్ధరామయ్యను తొలగిస్తే తెలంగాణ ప్రభుత్వమూ కూలుతుందని కర్ణాటక మంత్రి సతీష్ అన్నారు. అసలు తెలంగాణ ప్రభుత్వం కూలుతుందని ఆ రాష్ట్ర మంత్రి ఎందుకు అనాల్సి వచ్చింది. ఇన్ని అంశాలు వెలుగులోకి వచ్చినా.. ఈడీ అధికారులు ఎందుకు మౌనంగా ఉన్నారు. అసలు తెలంగాణ కాంగ్రెస్‌ను ఎవరు రక్షిస్తున్నారు?’’ కేటీఆర్ సోషల్ మీడియా వేదికగా అనుమానం వ్యక్తం చేశారు. కాగా, ఇప్పటికే ఈ కుంభకోణానికి నైతిక బాధ్యత వహిస్తూ కర్ణాటక మంత్రి బి.నాగేంద్ర రాజీనామా చేసిన విషయం తెలిసిందే.