పోలీస్ అమరవీరుల త్యాగాలు మరువలేనివి : జిల్లా కలెక్టర్ నిఖిల

దిశ ప్రతినిధి, వికారాబాద్ : విధినిర్వహణలో తమ ప్రాణాలను సైతం లెక్కచేయకుండా శాంతి భద్రతల పరిరక్షణ, పౌరుల భద్రతకు వారి జీవితాలను తృణప్రాయంగా అర్పించుకున్న పోలీసు అమరవీరులను గుర్తు చేసుకోవలసిన అవసరం ఎంతైనా ఉందని జిల్లా కలెక్టర్ నిఖిల అన్నారు. పోలీసు అమరవీరుల సంస్మరణ దినం సందర్భంగా శుక్రవారం స్థానిక పోలీస్ పరేడ్ గ్రౌండ్స్ లో ఏర్పాటు చేసిన కార్యక్రమంలో జిల్లా కలెక్టర్ ముఖ్య అతిథిగా పాల్గొని అమరులైన పోలీసులకు ఘనంగా నివాళులర్పించారు.

ఈ సందర్భంగా జిల్లా కలెక్టర్ నిఖిల మాట్లాడుతూ, విధి నిర్వహణలో తమ కుటుంబాలను సైతం త్యాగం చేస్తూ మన అందరి కోసం పోలీసులు ఎన్నో సేవలు అందిస్తారని అన్నారు. ముఖ్యంగా కరోనా కష్టకాలంలో అందరికంటే ముందు నిలిచి వారి ప్రాణాలకు సైతం లెక్క చేయకుండా మనకోసం మన ప్రాణాలు కాపాడేందుకు ఎంతగానో శ్రమించారని గుర్తు చేశారు. పోలీసుల సేవలు మరువలేనివని అన్నారు. ఈ కార్యక్రమంలో అడిషనల్ ఎస్పీలు రషీద్, మురళి డీఎస్పీలు, పోలీసు సిబ్బంది తదితరులు పాల్గొన్నారు.