ఈ నెలలో తెలంగాణకు రాహుల్ గాంధీ.. మూడు రోజుల పాటు ఇక్కడే..

దిశ, వెబ్‌డెస్క్: కాంగ్రెస్ అగ్రనేత రాహుల్ గాంధీ తెలంగాణ పర్యటనకు రానున్నారు. ఈ నెల రెండో వారంలో రాష్ట్రానికి వచ్చేందుకు షెడ్యూల్ ఖరారు అయింది. రాష్ట్రంలో ఏకంగా మూడు రోజుల పాటు రాహుల్ గాంధీ వివిధ ప్రాంతాల్లో పర్యటించనున్నారు. రాహుల్ పర్యటనకు సంబంధించి ఇప్పటికే ఏఐసీసీ నుంచి రాష్ట్ర కాంగ్రెస్ శాఖకు సమాచారం వచ్చింది. దీంతో ఏర్పాట్లు చేసేందుకు టీ కాంగ్రెస్ నేతలు సిద్దమవుతున్నారు. ఎన్నికల వేళ రాహుల్ పర్యటనతో టీ కాంగ్రెస్‌లో మరింత ఉత్సాహం రానుంది.

గత నెలలో హైదరాబాద్‌లోని తుక్కుగూడలో టీ కాంగ్రెస్ నిర్వహించిన విజయగర్జన భారీ బహిరంగ సభలో సోనియాగాంధీతో కలిసి రాహుల్ గాంధీ పాల్గొన్నారు. ఈ సభలో రాహుల్ తన ప్రసంగంలో బీఆర్ఎస్, బీజేపీలపై తీవ్ర ఆరోపణలు చేశారు. ఆ రెండు పార్టీలు ఒక్కటేనని విమర్శలు కురిపించారు. కాంగ్రెస్ అధికారంలోకి వస్తే ఆరు గ్యారెంటీలను తప్పకుండా అమలు చేస్తామని తెలిపారు. కాంగ్రెస్‌ను గెలిపించాలని ప్రజలను కోరారు. త్వరలో ఎన్నికల షెడ్యూల్ రానున్న క్రమంలో రాహుల్ పర్యటనను విజయవంతం చేయాలని, దీని వల్ల క్యాడర్‌లో ఉత్సాహం నింపాలని కాంగ్రెస్ వర్గాలు భావిస్తున్నాయి.