అనుమతులు ఒకలా... నిర్మాణాలు మరోలా...

దిశ, కూకట్​పల్లి: మూసాపేట్​ సర్కిల్​ అక్రమ నిర్మాణాలకు కేంద్రంగా మారింది. అనుమతులు ఒకలా తీసుకుని తమకు ఇష్టం వచ్చినట్టు బహుళ అంతస్థులను నిర్మిస్తూ కొంత మంది బిల్డర్​లు ప్రభుత్వ ఖజానాకు గండి పెడుతున్నారు. 12 నుంచి 15 ఫీట్ల రోడ్డులలో ఏకంగా 5 నుంచి 7 అంతస్తుల వరకు నిర్మాణాలు చేపట్టి జీహెచ్ఎంసీ ఖజానాకు గండి పెడుతున్నారు. ఒకటి రెండు కుటుంబాలు నివాసం ఉండాల్సిన భవనాలలో పరిమితికి మించి వ్యక్తులు నివాసం ఉంటుండడంతో డ్రైనేజి వ్యవస్థ, తాగునీటి సరఫరా, విద్యుత్​ కనెక్షన్​, ట్రాఫిక్​, రోడ్లపై అక్రమ పార్కింగ్​ ఇలా సమస్యల వలయంలో ఆయా కాలనీలు చిక్కుకుని ప్రజలు ఇబ్బందులు ఎదురుకుంటున్నారు.

జీహెచ్ఎంసీకి సవాల్​ విసురుతున్న నిర్మాణదారులు..

మూసాపేట్​ సర్కిల్ పరిధిలోని కేపీహెచ్​బీ డివిజన్​, బాలాజీ నగర్​ డివిజన్​లలో అక్రమ నిర్మాణాల జోరు గత కొంత కాలంగా మూడు పువ్వులు ఆరు కాయలుగా కొనసాగుతుంది. వంద గజాలు, రెండు వందల గజాల స్థలంలో ఏకంగా 5, 6, 7 అంతస్తుల వరకు నిర్మాణాలు చేపడుతున్న నిర్మాణదారులు అధికారులకు పెద్ద సవాల్​గ మారారు. కేపీహెచ్​బీ టెంపుల్​ బస్టాప్​కు సమీపంలోని హెచ్​ఐజి కాలనీలో ఓ వ్యక్తి ఏకంగా ఆరు అంతస్థుల నిర్మాణం ఎటువంటి నిబంధనలు, సెట్​ బ్యాక్​లు లేకుండా నిర్మాణం చేపడుతున్నారు. భువజన విజయం మైదానం సమీపంలో కొందరు అనుమతలకు విరుద్దంగా 5,6 అంతస్థుల నిర్మాణం చేపట్టి జీహెచ్ఎంసీ అధికారులకు సవాల్​ విసురుతున్నారు.

పెరుగుతున్న భారం..

ఆసియా ఖండంలోనే అతిపెద్ద కాలనీగా పేరు గాంచిన కేపీహెచ్​బీ కాలనీ నాలుగు దశాబ్దాల క్రితం నిర్మించింది. కాలనీలో ఎల్​ఐజి, ఎంఐజీ, హెచ్​ఐజీలుగా తరగతులును విడదీసి వంద గజాల నుంచి 300 గజాల వరకు ప్లాట్​లను కేటాయించి హౌసింగ్​ బోర్డు శాఖ అప్పట్లో 12 నుంచి 25 ఫీట్ల వరకు రోడ్లను కేటాయించి లేఔట్​ చేశారు. 12 ఫీట్ల రోడ్డులో నిర్మించిన బహుళ అంతస్థుల నిర్మాణాల కారణంగా తరచు డ్రైనేజి పొంగడం, తాగునీటి సరఫరా సరిపోక పోవడం, విద్యుత్​ సమస్యలు, ట్రాఫిక్​ సమస్యతో కాలనీ వాసులు ఇబ్బందులు ఎదురుకుంటున్నారు. కొత్త డ్రైనేజీ వ్యవస్థ, తాగు నీటి పైప్​లైన్​ పనులు చేపట్టాలంటే ప్రభుత్వానికి ఇది అదనపు భారంగా మారింది. అసలు ప్రభుత్వ ఖజానాకు గండి పెట్టి ఎటువంటి అనుమతులు తీసుకోకుండా నిర్మించిన భవనాలు ఉన్న కాలనీలలో ప్రజా ధనాన్ని వృద్ధా చేస్తు మౌలిక వసతులు కల్పించడం ఏంటని ప్రజలు ప్రశ్నిస్తున్నారు.