దిశ, కూకట్పల్లి : డబ్బుల విషయంలో ఇద్దరు వ్యక్తుల మధ్య జరిగిన గొడవలో ఒకరు మృతి చెందిన సంఘటన కేపీహెచ్బీ పోలీస్ స్టేషన్ పరిధిలో చోటు చేసుకుంది. కేపీహెచ్బీ సిఐ వెంకటేశ్వర్ రావు తెలిపిన వివరాల ప్రకారం అడ్డగుట్ట శంకర్ విలాస్ హోటల్ ఎదురుగా మెదక్ నర్సాపూర్కు చెందిన ఎండి ఉస్మాన్(36) అరటి పండ్ల వ్యపారం నిర్వహించుకుంటున్నాడు. అడ్డగుట్ట ఎస్ఎస్వి పీజీ హాస్టల్లో పని చేస్తున్న దత్తు అలియాస్ అశు(24) తరచు ఉస్మాన్ పండ్ల బండి వద్దకు వచ్చి అతడి వద్ద నుంచి డబ్బులు తీసుకుని వెళుతుండే వాడు. ఈ క్రమంలో శనివారం దత్తు, ఉస్మాన్ వద్ద నుంచి తన మొబైల్, 400 రూపాయలు తీసుకున్నాడు. దీంతో ఉస్మాన్ తన డబ్బులు తిరిగి ఇవ్వాలని దత్తును నిలదీశాడు. డబ్బులు ఇవ్వక పోవడంతో ఉస్మాన్ దత్తును కొట్టాడు. దీంతో గొడవ పెరిగింది, దత్తు తిరిగి ఉస్మాన్పై దాడికి ప్రయత్నించడంతో ఉస్మాన్ అక్కడే ఉన్న కర్రతో దత్తు తలపై దాడి చేశాడు. దీంతో దత్తు అక్కడికక్కడే కుప్పకూలి మృతి చెందాడు. ఇదిలా ఉండగా గొడవ జరిగిన సమయంలో ఇద్దరు మధ్యం సేవించి ఉన్నారని సిఐ వెంకటేశ్వర్ రావు తెలిపారు.