‘దిశ’ ఎఫెక్ట్..వాసవి నిర్మాణ సంస్థపై దర్యాప్తు ప్రారంభం..

దిశ, కూకట్​పల్లి: వడ్డించే వాడు మనోడైతే చాలు ఏ బంతిలో కూర్చుంటే ఏముంది మనకు రావలసింది వచ్చేస్తుంది అన్న చందంగా తయారైంది కూకట్​పల్లిలో వాసవి నిర్మాణ సంస్థ భారీ నిర్మాణాల కథ. ఒక వైపు నాలా కన్వర్షన్​ కానే లేదు, జీహెచ్ఎంసీ అనుమతులు ఇచ్చేసింది. ధరణిలో అప్డేట్​ కానేలేదు. వ్యవసాయ భూములలో ఎంచక్క భారి టవర్​ నిర్మాణ పనులు చక చక ముందుకు సాగుతున్నాయి. కూకట్​పల్లి నియోజకవర్గం పరిధిలో రెండు వందల ఎకరాల చెరువు కబ్జా కోరల్లో చిక్కుకుంటే అధికారులు మీన వేషాలు వేస్తున్నారు. ఎఫ్​టిఎల్​, బఫర్​ జోన్​లలోని భూములలో యధేచ్చగా భారీ టవర్​ల నిర్మాణాలను నిర్మించుకునేందుకు జీహెచ్ఎంసీ యంత్రాంగం అంతా దగ్గరుండి గ్రీన్​ సిగ్నల్​ ఇచ్చినట్లు ఉంది వాసవి నిర్మాణల కథ చూస్తుంటే.

అనుమతులు ఎలా ఇచ్చారు..

కూకట్​పల్లి మైసమ్మ చెరువు సమీపంలో వాసవి నిర్మాణ సంస్థ నిర్మిస్తున్న 9 టవర్​లకు సంబంధించి ఆగస్టు 9, 2023లో జీహెచ్ఎంసీ నుంచి పర్మిట్​ నంబర్​ (2859/GHMCIKKPI2023-BP) అనుమతులు తీసుకున్నారు. ఇందులో 3 సెల్లర్​లు + 1 గ్రౌండ్​ + 29 ఫ్లోర్స్​ గా ఏ, బి, సి, డి, ఈ, ఎఫ్​, జి, ఎచ్​, ఐలు గా 9 బ్లాక్​ల నిర్మాణాన్ని చేపడుతున్నారు. కాగా వాసవి నిర్మాణ సంస్థ మూసాపేట్​ గ్రామానికి చెందిన సర్వే నంబర్​లు 49/A, 50A&B, 51A,B,C&D, 52 A,B&D, 53 A&B, 54/A, B, C, D, E&G, 55 A&B, 56 A&B, 57 A&B, 66, 67, 68 A&B, 69, 70, 73, 76, 77, 78 A&C, 78 D&B, 79, 82, 83, 85, 86, 87/A, B & C, 88/B, C, D&F, 89/A, B, C, D&E, 90, 91, 99/Α లలోని భూములలో నిర్మాణాలు చేపడుతుంది. ఇదిలా ఉంటే అనుమతుల కోసం దరఖాస్తు చేసుకున్న సర్వే నంబర్​లలో చాలా వరకు ఇంకా ధరణిలో వ్యవసాయ భూములుగానే దర్శనమిస్తున్నాయి. నాలా కన్వర్షన్​ కాకుండానే జీహెచ్ఎంసీ అధికారులు ఏ ప్రాతిపాదికన అనుమతులు ఇచ్చారు అన్న ప్రశ్నలు ఉత్పన్నమవుతున్నాయి.

ఇంటెలిజెన్స్​ అధికారుల విచారణ..

వాసవి నిర్మాణ సంస్థ మైసమ్మ చెరువు ఎఫ్​టిఎల్​, బఫర్​ జోన్​ భూములలో భారీ టవర్​ల నిర్మాణాన్ని ప్రారంభించిన విషయాన్ని దిశ పత్రిక ప్రచురించడంతో సైబరాబాద్​ ఇంటెలిజెన్స్​ అధికారులు వాసవి నిర్మాణ సంస్థ నిర్మాణాలు, అనుమతుల విషయంపై దర్యాప్తు చేపట్టినట్లు సమాచారం. అనుమతులు ఎలా పొందారు. నాలా కన్వర్షన్​ కాకుండానే అనుమతులు జారి చేసిన విషయంపై ఆరా తీస్తున్నట్టు సమాచారం. మార్టిగేజ్​ ఎక్కువ పర్సంటేజ్ కట్టుకున్నట్టు, గత బీఆర్​ఎస్​ హయాంలో ప్రభుత్వ పెద్దలతో వావసి నిర్మాణ సంస్థ యాజమాన్యానికి ఉన్న సంబంధాలు, లావా దేవీల కారణంగానే అనుమతులు ఇచ్చే సమయంలో జీహెచ్ఎంసీ అధికారులు కండ్లకు గంతలు కట్టుకుని ఇచ్చారన్న ఆరోపణలు ఉన్నాయి. ఏది ఏమైనా వాసవి నిర్మాణ సంస్థ పై పూర్తి స్థాయి విచారణ చేపట్టి మైసమ్మ చెరువును కాపాడాలన్న వాదనలు వినిపిస్తున్నాయి.