Governor Jishnu Dev Verma : దేశాన్ని రక్షించడానికి సోదరులంతా రక్షగా ఉండాలి

దిశ,ఉప్పల్: ఉప్పల్ మినీ శిల్పరామంలో మల్కాజ్గిరి ఎంపీ ఈటల రాజేందర్ ఆధ్వర్యంలో రక్షాబంధన్ వేడుకలు ఘనంగా నిర్వహించారు.ఈ కార్యక్రమానికి ముఖ్య అతిథిగా తెలంగాణ రాష్ట్ర గవర్నర్ జిష్ణు దేవ్ వర్మ హాజరయ్యారు. ఈ సందర్భంగా గవర్నర్ మాట్లాడుతూ నన్ను రక్షించు అని చెబుతూ సోదరుడికి రాఖీ కడుతుంది సోదరి అదే రాఖీ పండుగ అన్నారు. దేశాన్ని రక్షించడానికి సోదరులంతా రక్షగా ఉండాలి.పది రోజుల యుద్ధంలో రావణుడిని రాముడు చంపేశాడు. లంకలోకి లక్ష్మణుడు వెళ్లినప్పుడు మన భూమి కంటే లంక బాగుంది అంటే మన భూమి మనకు అమ్మ లాంటిది అని రాముడు చెప్పాడు.మన భూమి మన సంస్కృతిని ఎప్పుడు మర్చిపోవద్దని పేర్కొన్నారు.

మనమంతా ఒక్కటే.. మనమంతా సమానమే.. మన సంస్కృతులన్నీ ఒక్కటే అన్నారు.మన సోదరినే కాదు సమాజాన్ని రక్షిస్తాం అని ప్రతిజ్ఞ చేద్దాం అని తెలిపారు.అనంతరం మల్కాజ్గిరి ఎంపీ ఈటల రాజేందర్ మాట్లాడుతూ భాషలు.. ప్రాంతాలు వేరైనా మనమంతా భారతీయులం, పరాయి మనిషి ఆపదలో ఉంటే ఆదుకునేది భారత్ అన్నారు. దేశానికి రక్షణ ఉన్నప్పుడే మనమంతా ప్రశాంతంగా ఉంటామని అన్నారు.జై భారత్ అని ప్రసంగాన్ని ముగించారు.