బట్టలు కొనుగోలు చేస్తూ కుప్పకూలిన వ్యక్తి మృతి

దిశ, కూకట్​పల్లి : బట్టల దుకాణంలో బట్టలు కొనుగోలు చేసేందుకు వెళ్లిన ఓ వ్యక్తి ఒక్క సారిగా కండ్లు తిరిగి కింద పడి మృతి చెందిన సంఘటన కేపీహెచ్​బీ పోలీస్​ స్టేషన్​ పరిధిలో చోటు చేసుకుంది. ప్రగతినగర్​ రాజీవ్​గృహకల్ప లో నివాసం ఉంటున్న కాల ప్రవీణ్​ కృష్ణ గౌడ్​(34) హుందాయి షోరూంలో పని చేస్తుంటాడు. బుధవారం ప్రగతి నగర్​ రోడ్డులోని ప్రసాద్​ ఆసుపత్రి సమీపంలో ఉన్న బట్టల దుకాణానికి వెళ్లి కొనుగోలు చేస్తుండగా ఒక్కసారిగా కుప్ప కూలాడు. బట్టల దుకాణం సిబ్బంది హుటాహుటిన ప్రవీణ్​ కృష్ణ గౌడ్​ను ఆసుపత్రికి తరలించగా అప్పటికే మృతి చెందినట్లు వైద్యులు ధ్రువీకరించారు. సమాచారం అందుకున్న కేపీహెచ్​బీ పోలీసులు వివరాలు సేకరించి ప్రవీణ్​ భార్య తేజశ్రీ కు సమాచారం అందించారు. మృతదేహాన్ని పోస్ట్​మార్టం నిమిత్తం గాంధీకి తరలించారు.