డప్పు కొట్టి.. డాన్స్ వేసిన ఎమ్మెల్యే .. సీఎం సభకు వినూత్న రీతిలో ప్రచారం

దిశ, వైరా : వైరాలో సీఎం రేవంత్ రెడ్డి పాల్గొనే రైతు సదస్సును విజయవంతం చేసేందుకు గత వారం రోజులుగా రాత్రింబవళ్లు శ్రమిస్తున్న వైరా ఎమ్మెల్యే మాలోత్ రాందాస్ నాయక్ మంగళవారం డప్పు దళ సభ్యులతో కలిసి డప్పు కొట్టి డాన్స్ వేసి సందడి చేశారు. అందుకు వైరాలోని మధిర క్రాస్ రోడ్ వేదిక అయింది. రైతు సదస్సును విజయవంతం చేసేందుకు వైరా మండలంలో కాంగ్రెస్ పార్టీ ఆధ్వర్యంలో డప్పు దళాలతో ప్రచారం నిర్వహించాలని నిర్ణయించారు. అందులో భాగంగా వైరాలోని మధిర క్రాస్ రోడ్ లో మంగళవారం డప్పు దళాల ప్రచారాన్ని ఎమ్మెల్యే మాలోత్ రాందాస్ నాయక్ ప్రారంభించారు. ఈ సందర్భంగా డప్పు దళ సభ్యులతో కలిసి ఎమ్మెల్యే రాందాస్ నాయక్ డప్పు కొట్టారు.

అనంతరం డప్పు వాయిద్యాలకు ఆయన నృత్యాలు చేసి సీఎం సదస్సును విజయవంతం చేయాలని వినూత్న రీతిలో ప్రచారం చేశారు. ఎమ్మెల్యే డప్పు కొట్టి నృత్యాలు చేయటంతో ఉత్తేజానికి గురైన కాంగ్రెస్ నాయకులు డాన్సులు వేశారు. అనంతరం వైరాలో ని ప్రధాన రహదారులపై డప్పు వాయిద్యాలతో ర్యాలీ నిర్వహించారు. వైరాలోని న్యూ లిటిల్ ఫ్లవర్ పాఠశాల సమీపంలో సీఎం రైతు సదస్సు వేదిక వద్ద ఏర్పాట్లను ఎమ్మెల్యే పరిశీలించారు. ఈ కార్యక్రమంలో రాష్ట్ర హస్తకళల అభివృద్ధి సంస్థ చైర్మన్ నాయుడు సత్యనారాయణ, మార్క్ఫెడ్ రాష్ట్ర మాజీ వైస్ చైర్మన్ బొర్రా రాజశేఖర్, పీసీసీ కార్యదర్శి కట్ల రంగారావు, వైరా మున్సిపాలిటీ చైర్మన్ సూతకాని జైపాల్, కాంగ్రెస్ మండల అధ్యక్షుడు శీలం వెంకట నర్సిరెడ్డి, కాంగ్రెస్ నాయకులు దాసరి దానియేలు, సూర్యదేవర శ్రీధర్, పొదిళ్ళ హరినాథ్, పణితి సైదులు, కొప్పురావురి శబరి నాథ్, కట్ల సంతోష్, బోళ్ల గంగారావు, దార్న రాజశేఖర్ తదితరులు పాల్గొన్నారు.