ఆర్టీసీ సిబ్బంది పెద్ద మనస్సు..

దిశ, వేములవాడ : ఆర్టీసీ సిబ్బంది పెద్ద మనస్సుతో ఆలోచించి ప్రయాణికుడు మర్చిపోయిన బ్యాగ్ ను తిరిగి ప్రయాణికుడికి అందజేసిన సంఘటన గురువారం వేములవాడ ఆర్టీసీ బస్టాండ్ లో చోటుచేసుకుంది. వివరాల్లోకి వెళితే కామారెడ్డిలో బస్సు ఎక్కిన ఓ ప్రయాణికుడు సిరిసిల్ల బస్టాండ్ వద్దకు బస్సు చేరుకోగానే బస్సులో నుండి దిగి మరుగుదొడ్డికి వెళ్ళాడు. ఈ క్రమంలో తన బ్యాగును బస్సులోనే మర్చిపోగా బస్సు అప్పటికే వేములవాడకు చేరుకుంది.

దీంతో ఆందోళన చెందిన ప్రయాణికుడు వెంటనే విషయాన్ని అక్కడి కంట్రోలర్ కు తెలపగా ఆయన వెంటనే వేములవాడ కంట్రోలర్ ఫోన్ చేసి జరిగిన సంఘటనను తెలిపారు. ఈ క్రమంలో వేములవాడ బస్టాండ్ లో డ్యూటీలో ఉన్న ట్రాఫిక్ సూపర్వైజర్ సత్యనారాయణ, పి.ఆర్వో శ్రీనివాస్ యాదవ్, ప్యాసింజర్ గైడ్ కొండయ్యలు బస్సులోని బ్యాగ్ ను స్వాధీనం చేసుకొని బ్యాగుతో పాటు అందులోని రూ. 75 వేల నగదును ప్రయాణికుడికి అందజేశారు. ఈ సందర్భంగా ప్రయాణికుడు మాట్లాడుతూ ఆర్టీసీ సిబ్బందికి కృతజ్ఞతలు తెలిపాడు.