ఫుల్లుగా తాగి ట్రాన్స్​ఫార్మర్​ పక్కన నిద్ర...మత్తు దిగేలోగా ఆస్పత్రిలో....

దిశ, జగిత్యాల టౌన్ : పీకల దాకా మద్యం తాగిన ఓ వ్యక్తి తృటిలో ప్రాణాపాయం నుండి బయటపడ్డాడు. మద్యం మత్తులో ట్రాన్స్​ఫార్మర్​ గద్దె పైకి ఎక్కిన గుర్తు తెలియని వ్యక్తి దాని పక్కనే నిద్రించాడు. అయితే మత్తులో ట్రాన్స్​ఫార్మర్​ తీగలు తాకడంతో కరెంట్ షాక్ తగిలి గాయాల పాలయ్యాడు. గమనించిన స్థానికులు వెంటనే 108కు సమాచారం అందించగా సంఘటనా స్థలానికి చేరుకున్న సిబ్బంది కరెంట్ సప్లై నిలిపి వేయించి బాధితుడ్ని ఆసుపత్రికి తరలించారు. ఈ ఘటన శుక్రవారం రాత్రి జగిత్యాల పట్టణంలోని ఓల్డ్ బస్టాండ్ సమీపంలో చోటు చేసుకోగా ఇందుకు సంబంధించిన పూర్తి వివరాలు తెలియాల్సి ఉంది. కాగా మద్యం మత్తులో ట్రాన్స్​ఫార్మర్​ పక్కన పడుకున్న మందుబాబు వీడియో నెట్టింట వైరల్ గా మారింది.