అభివృద్ధి చేసిన.. మరల అసెంబ్లీకి పంపండి..

దిశ, రామడుగు : అభివృద్ధి చేశాను మరల అసెంబ్లీకి పంపండి అని చొప్పదండి నియోజకవర్గం అభ్యర్థి సుంకే రవిశంకర్ ఓటర్లను అభ్యర్థించారు. శనివారం రామడుగు మండలంలోని తిరుమలాపూర్, శ్రీరాములపల్లి గ్రామాలలో ఎన్నికల ప్రచారం నిర్వహించారు. ఈ సందర్భంగా రవిశంకర్ మాట్లాడుతూ నియోజకవర్గ అభివృద్ధి ధ్యేయంగా పనిచేస్తున్నానని, స్థానిక బిడ్డనైన తనను ఆశీర్వదించి గెలిపించాలని కోరారు.

ఎన్నికల ముందు వచ్చి మరల వెళ్లిపోయే నాయకులకు ఈ ప్రాంతం మీద మమకారం ఉండదని, పార్టీలకు అతీతంగా తాను అభివృద్ధి సంక్షేమ పథకాలను అందజేశానని అన్నారు. తెలంగాణలో నవంబర్ 30 తారీఖున జరగనున్న సార్వత్రిక ఎన్నికలను దృష్టిలో పెట్టుకొని బీఆర్ఎస్ అధినేత ముఖ్యమంత్రి కేసీఆర్ ప్రకటించిన ఎన్నికల మేనిఫెస్టో రాష్ట్ర ప్రజల ఆశలకు అనుగుణంగా ఉందని, అన్ని వర్గాల జీవితాల్లో వెలుగు నింపేలా ఉన్నదని అన్నారు. రవిశంకర్ ప్రసంగం అనంతరం గ్రామంలో పలువురిని బీఆర్ఎస్ కండువా కప్పి పార్టీలోకి ఆహ్వానించారు.