ఫ్రీగా పాస్‌పోర్ట్, అమెరికా వీసా.. Munugode యువతకు బంపర్ ఆఫర్

దిశ, డైనమిక్ బ్యూరో: ప్రజాశాంతి పార్టీ అధ్యక్షుడు కేఏ పాల్ ఏది మాట్లాడినా ఒక సంచలనమే అవుతుంది. మునుగోడులో ప్రధాన పార్టీలైన టీఆర్ఎస్, బీజేపీ, కాంగ్రెస్ పార్టీలు భారీ బహిరంగ సభలతో, తాయిలాలతో ప్రచారం ముమ్మరం చేశాయి. మునుగోడు ఉపఎన్నికల్లో పోటీ చేస్తానని ప్రజాశాంతి పార్టీ అధ్యక్షుడు కేఏ పాల్ ఇప్పటికే ప్రకటించిన విషయం తెలిసిందే. ఈ నేపథ్యంలో కేఏ పాల్ యువతను ఆకర్షించేందుకు సంచలన ప్రకటన చేశారు. తన 59వ పుట్టినరోజు సందర్భంగా నియోజకవర్గంలోని 59 మంది నిరుద్యోగులను లాటరీ పద్ధతిన ఎంపిక చేయనున్నట్లు తెలిపారు. ఎంపిక చేసిన వారికి పాస్‌పోర్ట్‌, అమెరికా వీసా ఉచితంగా ఇప్పించనున్నట్లు ప్రకటించారు.

కేసీఆర్‌, మోడీ యువతను మోసం చేస్తున్నారని కేఏ పాల్ ఆరోపించారు. రాజకీయ నాయకులు మాత్రమే విదేశాల్లో చదవాలని ఉందా? విదేశాల్లో మన యువత ఎందుకు చదువుకోకూడదు అంటూ ప్రశ్నించారు. మంత్రి కేటీఆర్, ఏపీ సీఎం జగన్ వంటి నాయకులు చదువుకున్న చోట మునుగోడు యువత కూడా చదివి గొప్ప స్థాయికి ఎదగాలని కోరుకుంటూ కేఏ పాల్ ఈ నిర్ణయం తీసుకుంటున్నట్లు తెలిపారు. నిరుద్యోగుల కష్టాలు తనకే తెలుసని అన్నారు. తన పుట్టినరోజు కానుకగా అందిస్తున్న అవకాశాన్ని మునుగోడు యువత ఉపయోగించుకోవాలని ట్విట్టర్ వేదికగా ఆయన కోరారు.