రేవంత్ హటావో.. కాంగ్రెస్ బచావో: జగ్గారెడ్డి సంచలన వ్యాఖ్యలు

దిశ, వెబ్‌డెస్క్: టీపీసీసీ చీఫ్ రేవంత్ రెడ్డిపై కాంగ్రెస్ సీనియర్ నేత, సంగారెడ్డి ఎమ్మెల్యే జగ్గారెడ్డి మరోసారి సంచలన వ్యాఖ్యలు చేశాడు. తెలంగాణ కాంగ్రెస్‌కు సారథ్యం వహించేది వలస నాయకుడని.. టీపీసీసీ అధ్యక్షుడిపైనే మా అభ్యంతరమని జగ్గారెడ్డి తేల్చి చెప్పారు. రేవంత్ హటావో.. కాంగ్రెస్ బచావో అని ఏకంగా సొంత పార్టీ రాష్ట్ర అధ్యక్షుడిపైనే సంచలన వ్యాఖ్యలు చేశారు. అలాగే తాను వర్కింగ్ ప్రెసిడెంట్ పదవికి రాజీనామా చేయనని.. ఇప్పట్లో తనకు రాజీనామా చేసే ఆలోచన లేదని స్పష్టం చేశారు.

ఇదిలా ఉంటే.. టీపీసీసీ నూతన కమిటీలపై కాంగ్రెస్ పార్టీ సీనియర్లు తీవ్ర ఆగ్రహంగా ఉన్నారు. కమిటీల్లో సీనియర్లకు అన్యాయం జరిగిందని.. దీనిపై చర్చించేందుకు రాష్ట్ర కాంగ్రెస్ సీనియర్ నేతలు సీఎల్పీ నేత భట్టి విక్రమార్క ఇంట్లో భేటీ అయ్యారు. ఈ సమావేశంలో సీనియర్లు పలు కీలక నిర్ణయాలు తీసుకున్నారు. కాంగ్రెస్ కమిటీలు ఏకపక్షంగా వేశారని.. దీనిపై అధిష్టానానికి ఫిర్యాదు చేస్తామని తెలిపారు. కమిటీల అంశం ఓ కొలిక్కి వచ్చే వరకు టీపీసీసీ చీఫ్ రేవంత్ రెడ్డి నిర్వహించే కార్యక్రమాలకు దూరంగా ఉండాలని సీనియర్లు కీలక నిర్ణయం తీసుకున్నారు. రాష్ట్రంలో మరో ఏడాదిలో ఎన్నికలు జరగనున్న నేపథ్యంలో అధికార బీఆర్ఎస్ పార్టీ, బీజేపీలు ఎన్నికలకు సన్నద్దం అవుతుంటే.. కాంగ్రెస్ మాత్రం ఎప్పటిలాగే వర్గ విభేదాలతో కొట్టుమిట్టాడం గమనార్హం.