యూసఫ్ గుడాలో భారీ అగ్నిప్రమాదం

దిశ, జూబ్లీహిల్స్: షార్ట్ సర్క్యూట్ అయ్యి జూబ్లీహిల్స్, యూసఫ్‌గూడలోని భారీ అగ్ని ప్రమాదం చోటు చేసుకుంది. వివరాల్లోకి వెళితే... యూసఫ్‌గూడలోని హైదరాబాద్ బిర్యాని హౌస్ పక్కనే ఉన్న మహ్మద్ షఫీ యజమాని ఆటోమొబైల్ షాప్‌లో గురువారం ఉదయం 5 గంటల సమయంలో ఒక్కసారిగా మంటలు చెలరేగాయి. దుకాణంలో మంటలు చెలరేగడంతో పక్కనే ఉన్న ప్రజలు ఒక్కసారిగా భయాందోళనకు గురయ్యారు. వెంటనే పోలీసులకు ఫైర్‌ సిబ్బందికి సమాచారం ఇచ్చారు. ప్రమాదంపై సమాచారం అందుకున్న అగ్నిమాపక సిబ్బంది హుటాహుటిన ఘటనా స్థలానికి చేరుకుని సహాయక చర్యలు చేపట్టారు. అనంతరం ఫైర్‌ ఇంజన్లతో మంటలను అదుపు చేసే ప్రయత్నం చేశారు.

ఈ ప్రమాదంలో ఆటోమొబైల్ షాపులోని సామాగ్రి పూర్తిగా దగ్ధమైంది. తెల్లవారుజామున జరిగిన ఈ ప్రమాదంలో షాపులో ఎవరూ లేకపోవడంతో ఎటువంటి ప్రాణనష్టం జరగలేదు. ఫైరింజన్లతో మంటలను ఆర్పేందుకు అగ్నిమాపక సిబ్బంది తీవ్రంగా శ్రమించి మంటలను అదుపులోకి తీసుకువచ్చారు. ఈ ప్రమాదంలో భారీ ఎత్తున నష్టం జరిగినట్లు అధికారులు అంచనా వేస్తున్నారు. షాపులో అగ్ని ప్రమాదం జరిగిన విషయం తెలుసుకున్న యజమాని మహ్మద్ షఫీ ఘటనా స్థలానికి చేరుకున్నారు. షాపులో మంటలు చూసి తీవ్ర ఆవేదనకు గురయ్యారు. షాప్ లో లక్షల విలువ సామాగ్రి మంటల్లో దగ్ధం కావటంతో ప్రభుత్వం ఆదుకోవాలని విజ్ఞప్తి చేస్తున్నాడు. ఘటనపై కేసు నమోదు చేసిన పోలీసులు దర్యాప్తు చేస్తున్నారు.