బీజేపీ నాయకుడిపై దాడి ఘటనలో ముగ్గురిపై కేసులు నమోదు

దిశ, చార్మినార్​ : కోర్టులో పెండింగ్​ ఉన్న స్థలం విషయంలో జరిగిన ఘర్షణలో బీజేపీ నాయకుడిపై దాడిచేసి గాయపరిచిన ఘటనలో ముగ్గురిపై ఛత్రినాక పోలీసులు కేసులు నమోదు చేశారు. వివరాలలోకి వెళితే ... పాతబస్తీ అలియాబాద్ లో ఈ నెల 2వ తేదీన కోర్టులో పెండింగ్​ ఉన్న స్థలంలో విధ్వంసం సృష్టించడానికి ప్రయత్నించిన వారిని అడ్డుకునే ప్రయత్నం చేసిన బీజేపీ సీనియర్​ నాయకుడు పొన్న వెంకటరమణ పై విజయలక్ష్మి కుటుంబ సభ్యులు కటర్​ పైప్​ తో దాడిచేశారు. దీంతో బాధితుడు పొన్న వెంకటరమణ తనపై దాడికి పాల్పడిన వారిపై ఛత్రినాక పోలీసులకు ఫిర్యాదు చేశాడు. అతను ఇచ్చిన ఫిర్యాదు మేరకు కేసును నమోదు చేసుకున్న ఛత్రినాక పోలీసులు డి.విజయలక్ష్మి , సయ్యద్​, దేశం నరేష్​ లపై 329(4), 324(4), 303(2), 118(1)రెడ్​ విత్​ 3(5) బిఎన్​ ఎస్​ యాక్ట్​ కింద కేసులు నమోదు చేశారు. ఈ కేసును ఛత్రినాక పోలీసులు దర్యాప్తు చేస్తున్నారు.