రేపు చర్లపల్లి రైల్వే నూతన టెర్మినల్​స్టేషన్ ప్రారంభం

దిశ, తెలంగాణ బ్యూరో : దక్షిణ మధ్య రైల్వే పరిధిలోని నూతనంగా నిర్మించిన చర్లపల్లి నూతన టెర్మినల్​స్టేషన్​ప్రధానమంత్రి నరేంద్రమోడీ ప్రారంభించనున్నారు. సోమవారం ఉదయం 10 గంటలకు ఢిల్లీ నుంచి వీడియో కాన్ఫరెన్సింగ్ ద్వారా ప్రారంభిస్తారు. ఈ కార్యక్రమంలో గవర్నర్​ జీష్ణు దేవ్​వర్మ, ముఖ్యమంత్రి రేవంత్​రెడ్డి, కేంద్ర రైల్వే శాఖ మంత్రి అశ్విని వైష్ణవ్, కేంద్ర మంత్రులు కిషన్​ రెడ్డి, బండి సంజయ్, రాష్ట్ర మంత్రులు శ్రీధర్​బాబు, స్థానిక ఎంపీ ఈటల రాజేందర్​లు హాజరవుతారు. సికింద్రాబాద్​ రైల్వే స్టేషన్​పై భారం తగ్గించడంలో భాగంగా చర్లపల్లి టెర్మినల్ ను రైల్వే శాఖ నిర్మించింది. దీనికి రూ.413 కోట్లు వెచ్చించారు. చర్లపల్లి టెర్మినల్​ను అత్యాధునిక వసతులతో నిర్మించారు. విమానాశ్రయాన్ని తలపించే తరహాలో దీనిని నిర్మించారు. ప్రయాణికులకు అన్ని రకాల వసతులు ఉండే విధంగా ఆధునాతనంగా దీనిని ఏర్పాటు చేశారు. ఇక్కడ 9 ఫ్లాట్​ ఫాంలను ఏర్పాటు చేశారు. సికింద్రాబాద్​లో ప్రస్తుతమున్న ఫ్లాట్​ పాం ల సంఖ్య సరిపోకపోవడంతో ఒత్తిడి పెరుగుతుంది. రైళ్లు ఫ్లాట్​ఫాంలు లేక ఆలస్యం అవుతున్నాయని గుర్తించి ప్రత్యామ్నాయ ఏర్పాట్లలో భాగంగా దీనిని అభివృద్ధి చేశారు. రాబోయే రోజుల్లో ఇక్కడే అనేక రైళ్లు ఆగనున్నాయి. ఇక్కడి నుంచే ప్రారంభంకానున్నాయి.