హుక్కా సెంటర్​పై బాలాపూర్​ పోలీసుల దాడులు

దిశ, బడంగ్ పేట్​ : నిబంధనలకు విరుద్దంగా అక్రమంగా నడుపుతున్న హుక్కా సెంటర్​పై బాలాపూర్​ పోలీసులు దాడులు నిర్వహించారు. హుక్కా సెంటర్​ యజమానితో పాటు మేనేజర్​ను మరో ఐదుగురు కస్టమర్​లను అదుపులోకి తీసుకుని బాలాపూర్​ పోలీసులు నోటీసులు అందజేశారు. బాలాపూర్​ ఇన్​స్పెక్టర్​ ఎం.సుధాకర్​ తెలిపిన వివరాల ప్రకారం ... సుల్తాన్​పూర్​ ప్రాంతంలో గత కొంత కాలంగా నిబంధనలకు విరుద్దంగా యాహ్యా హుక్కా సెంటర్​ను నడిపిస్తున్నాడు. అందులో షోయబ్​ మేనేజర్​గా విధులు నిర్వహిస్తున్నాడు. విశ్వసనీయ సమాచారం మేరకు బాలాపూర్​ ఇన్​స్పెక్టర్​ ఎం.సుధాకర్​ బృందం హుక్కా సెంటర్​పై దాడులు నిర్వహించారు.

ఎటువంటి లైసెన్సు లేకుండా నిబంధనలకు విరుద్దంగా యాహ్యా హుక్కా సెంటర్​ను అక్రమంగా నడుపుతున్నట్లు పోలీసులు గుర్తించారు. హుక్కా సెంటర్​ యజమాని యాహ్యాతో పాటు మేనేజర్​ షోయబ్​, ఐదు గురు కస్టమర్లు సోఫియా బాబా (26), సయ్యద్​ మన్సూర్​ (20), సయ్యద్​ అస్లామ్​(19), మొహమ్మద్​ నూర్​ (19), షేక్​ ఆలీ (22) లను పోలీసులు అదుపులోకి తీసుకుని నోటీసులు అందజేశారు. వారి వద్ద నుంచి 8 హుక్కా పాట్స్​, 16 హుక్కా పైప్స్​, 5 బ్రిక్​ కోల్​ బాక్సెస్​, కోకనెట్​ కోల్​ బాక్స్​, నాలుగు సెల్​ఫోన్​లను పోలీసులు స్వాధీనం చేసుకున్నారు. ఈ కేసును బాలాపూర్​ పోలీసులు దర్యాప్తు చేస్తున్నారు.