Police Battalion : స్పెషల్ పోలీస్ బెటాలియన్ లో ఆందోళనలకు 10 మంది బాధ్యులు..

దిశ, సిటీ క్రైం : పోలీస్ మాన్యువల్, పోలీస్ ఫోర్సెస్, పోలీసు యాక్ట్ నిబంధనలకు, మార్గ దర్శకాలకు విరుద్ధంగా పోలీసు ప్రతిష్టను దిగజార్చి, కించ పరిచే విధంగా ప్రవర్తిస్తే శాఖ పరంగా కఠిన చర్యలు తప్పవని తెలంగాణ స్పెషల్ పోలీసు ( Special Police Battalion ) అదనపు డీజీ సంజయ్ జైన్ హెచ్చరించారు. ఇటీవల రాష్ట్ర వ్యాప్తంగా స్పెషల్ పోలీస్ బెటాలియన్ లో చోటుచేసుకున్న నిరసనలు, ఆందోళనలు, ధర్నాల పై విచారణ జరిపారు. ఈ ఆందోళనలకు కారణమైన 10 మంది హెడ్ కానిస్టేబుల్, కానిస్టేబుల్ స్థాయి అధికారులను పోలీస్ శాఖ నుంచి డిస్మిస్ చేస్తూ అదనపు డీజీ సంజయ్ జైన్ ఆదివారం ఉత్తర్వులు జారీ చేశారు.

పోలీస్ శాఖ ప్రతిష్టకు భంగం కలిగించే విధంగా ఏ అధికారి వ్యవహరించినా, ప్రవర్తించినా సహించేది లేదని అదనపు డీజీ ( Additional DG ) స్పష్టం చేశారు. రాజ్యాంగంలోని ఆర్టికల్ 311(2) (b) ప్రకారం ఈ 10 మందిని ఉద్యోగం నుంచి తొలగించినట్లు అదనపు డీజీ వివరించారు. యూనిఫామ్ సర్వీస్ లో క్రమశిక్షణను అతిక్రమించి దారి తప్పి ప్రవర్తిస్తే కచ్చితంగా చర్యలు ఉంటాయన్నారు. విచారణలో 3, 6, 12, 17 బెటాలియన్ లకు చెందిన ఈ 10 మంది కారణమని ఆధారాలు లభించడం ఉద్యోగం నుంచి తొలగించామని అదనపు డీజీ పేర్కొన్నారు. మీ సమస్యలు ఏమైనా ఉంటే బెటాలియన్ లో నిర్వహించే దర్బార్ లో అధికారులు దృష్టికి తీసుకురావాలన్నారు.