ఏ కష్టం వచ్చినా ఫోన్ చేయండి.. క్షణాల్లో మీ ముందుంటా: హరీష్ రావు

దిశ, వెబ్‌డెస్క్: బీఆర్ఎస్ కార్యకర్తలకు ఏ కష్టం వచ్చినా వెంటనే అక్కడకు వస్తానని మాజీ మంత్రి, సిద్దిపేట ఎమ్మెల్యే హరీష్ రావు భరోసా ఇచ్చారు. మంగళవారం హరీష్ రావు షాద్‌నగర్ నియోజకవర్గ నేతలతో సమావేశమయ్యారు. ఈ సందర్భంగా ఆయన మాట్లాడుతూ.. తెలంగాణ ఉద్యమంలో షాద్ నగర్ ప్రజలు పోరాట స్ఫూర్తిని చూపించారని కొనియాడారు. ఎన్నికలకు ముందు కాంగ్రెస్‌ అరచేతిలో వైకుంఠం చూపించింది.. గెలిచాక చేతులెత్తేసిందని ఎద్దేవా చేశారు.

స్వల్ప మెజార్టీతో షాద్‌ నగర్‌లో ఓడిపోయామని గుర్తుచేశారు. ఎన్నికల్లో ప్రజలకు ఇచ్చిన హామీలు అమలు చేసేవరకు కాంగ్రెస్‌ను వదిలిపెట్టమని హరీష్ రావు కీలక వ్యాఖ్యలు చేశారు. కార్యకర్తలకు ఏదైనా ఇబ్బంది వస్తే వెంటనే ఫోన్ చేయండి.. తక్షణమే మీ ముందుంటా అని హామీ ఇచ్చారు. కేసీఆర్ ఒక్కడిగా బయలుదేరి ఢిల్లీని కదిలించి తెలంగాణ సాధించుకొచ్చారని చారని గుర్తుచేశారు.