‘‘ఇలా చూడలేకపోతున్నాం సార్’’.. ఊతకర్ర సాయంతో నడుస్తోన్న కేసీఆర్ (వీడియో)

దిశ, వెబ్‌డెస్క్: బీఆర్ఎస్ అధినేత, మాజీ సీఎం కేసీఆర్ గత డిసెంబర్‌లో ఎర్రవెల్లి ఫామ్ హౌజ్‌లో కాలు జారి పడి కిందపడిన విషయం తెలిసిందే. ఈ ప్రమాదంలో కేసీఆర్ తుంటి ఎముక విరగడంతో సోమాజిగూడ యశోద ఆసుపత్రి వైద్యులు ఆయనకు హిల్ రిప్లేస్‌మెంట్ సర్జరీ చేశారు. తుంటి ఎముక మార్పిడి శస్రచికిత్స విజయవంతం కావడంతో గులాబీ బాస్ జూబ్లీహిల్స్‌ నందీశ్వర్ నగర్‌లోని తన నివాసంలో రెస్ట్ తీసుకున్నారు. ఇటీవల మళ్లీ ఎర్రవెల్లి ఫామ్ హౌజ్‌‌కు వెళ్లారు. ఈ నేపథ్యంలో కేసీఆర్ కోలుకుంటున్న వీడియోను బీఆర్ఎస్ ఎంపీ జోగినపల్లి సంతోష్ తాజాగా ఎక్స్ (ట్విట్టర్)లో పోస్ట్ చేశారు.

‘‘మరింత దృడ సంకల్పంతో ప్రజల ముందుకు త్వరలో కేసీఆర్ వస్తారు’’ అని సంతోష్ కుమార్ ఆశాభావం వ్యక్తం చేశారు. ఇక, ఈ వీడియోలో బీఆర్ఎస్ బాస్ కేసీఆర్ ఊత కర్ర పట్టుకుని నడక ప్రాక్టీస్ చేస్తున్నారు. ఎవరి సహయం లేకుండా కేసీఆర్ ఒంటరిగానే నడుస్తున్నారు. ప్రస్తుతం కేసీఆర్ వాక్ చేస్తోన్న వీడియో సోషల్ మీడియాలో వైరల్‌గా మారింది. ‘‘మిమ్మల్ని ఇలా చూడలేకపోతున్నాం సార్.. త్వరగా కోలుకుని మళ్లీ మీరు ప్రజల ముందుకు రావాలి సార్’’ అని పలువురు నెటిజన్లు కామెంట్స్ చేస్తున్నారు.