Kalvakuntla Kavitha నివాసం వద్ద సంచలనంగా మారిన ఫ్లెక్సీలు..!

దిశ, డైనమిక్ బ్యూరో: ఢిల్లీ లిక్కర్ స్కాంలో ప్రశ్నించేందుకు రేపు ఉదయం సీబీఐ రాబోతున్న నేపథ్యంలో టీఆర్ఎస్ ఎమ్మెల్సీ కవిత నివాసం వద్ద ఫ్లెక్సీలు సంచలనంగా మారాయి. డాటర్ ఆఫ్ ఫైటర్ విల్ నెవ్వర్ ఫియర్ అంటూ వీఆర్ విత్ కవిత అక్క అనే హ్యాష్ ట్యాగ్‌తో ఉన్న ఫ్లెక్సీలు ఆసక్తిని రేపుతున్నాయి. ఢిల్లీ లిక్కర్ స్కాం విషయంలో తమకు ఉన్న అనుమానాలపై రేపు ఉదయం సీబీఐ అధికారులు కవిత నుంచి వివరణ తీసుకోనున్నారు. ఇందుకోసం ఆమె నివాసానికి దర్యాప్తు అధికారులు రానున్నారు. ఈ నేపథ్యంలో వీఆర్ విత్ యూ అంటూ ఫ్లెక్సీలు ప్రత్యక్షం కావడం చర్చనీయాంశంగా మారింది. మరో వైపు ఢిల్లీ లిక్కర్ స్కాంలో ఆరోపణలు ఎదుర్కొంటున్న కవితను అరెస్ట్ చేయాలంటూ సిద్దిపేట టౌన్‌లో నిరుద్యోగ జేఏసీ అధ్వర్యంలో ఆందోళన జరిగింది. 'సారాయి రాణి ఎమ్మెల్సీ కవితను వెంటరే అరెస్ట్ చేయాలి' అంటూ ఫ్లెక్సీలు ప్రదర్శించారు. ఈ నేపథ్యంలో రేపటి విచారణపై సర్వత్రా ఉత్కంఠ నెలకొంది.