రైతులకు గాలం వేసేందుకు కాంగ్రెస్ స్కెచ్.. ఒకే సారి రెండు లక్షలు రుణమాఫీ!

దిశ, తెలంగాణ బ్యూరో: రైతు బంధుతో రైతులంతా తమకే ఓట్లు వేస్తారనే భ్రమలో ఉన్న బీఆర్ఎస్​పార్టీకి కాంగ్రెస్ ​షాక్​ ఇవ్వనున్నది. ఏకకాలంలో రుణమాఫీ ప్రచారాన్ని ఇంటింటికీ తీసుకవెళ్లనున్నది. ఒకే విడతతో రూ.2 లక్షలు రైతు రుణాల మాఫీకి ఫిక్స్​ అయింది. 2004లో వైఎస్సార్​ప్రభుత్వం ఏర్పడగానే ఒక్క సంతకంతో రూ.లక్ష రూణమాఫీ చేసినట్లే.. ఈ సారి రూ.రెండు లక్షలు చేయనున్నట్లు ఆ పార్టీ విస్తృతంగా ప్రజల్లోకి తీసుకువెళ్లనున్నది.

ఊరూరా ప్రచారం చేయాలని భావిస్తున్నది. ఈ మేరకు అన్ని జిల్లాల్లో ఫ్లెక్సీలు రెడీ అవుతున్నాయి. వీటిని జిల్లా, మండల కేంద్రాలు, మార్కెట్లు, రైతు బజార్లలో ఏర్పాటు చేయనున్నారు. కిసాన్​కాంగ్రెస్, యూత్ కాంగ్రెస్​సమన్వయమై ఈ కార్యక్రమాన్ని ముందుకు తీసుకువెళ్లనున్నాయి. వాస్తవానికి వరంగల్ రైతు డిక్లరేషన్‌లోనే రూ.2 లక్షలు రుణమాఫీ చేస్తామని కాంగ్రెస్ హామీ ఇచ్చింది. కానీ ఏ విధానంలో చేయనున్నదనే అంశాన్ని ప్రస్తావించలేదు. ఇప్పుడు ఏఐసీసీ ఆదేశాల మేరకు ఒక్క సంతకంతో రూ.రెండు లక్షలు మాఫీ అని కాంగ్రెస్​పార్టీ రైతుల్లోకి వెళ్లనున్నది.

47 లక్షల మంది రైతులు

రాష్ట్ర వ్యాప్తంగా రైతు బంధు తీసుకుంటున్న లెక్కల ప్రకారం 67 లక్షల మంది రైతులు ఉన్నట్లు అంచనా. అయితే లక్ష రూపాయల రుణమాఫీకి 35 లక్షల మంది రైతులను ప్రభుత్వం గతంలో గుర్తించింది. ఇక రూ.రెండు లక్షల వరకు పెంచితే దాదాపు 47 లక్షల మంది అర్హత పొందుతారని కాంగ్రెస్​పార్టీ సమచారాన్ని సేకరించింది. ఈ వివరాలన్నింటినీ కాంగ్రెస్​పార్టీ కరపత్రాలు, ఫ్లెక్సీల రూపంలో ప్రజలకు వివరించాలని ప్లాన్ చేస్తున్నది. దీంతో పాటు కౌలు రైతుల సమస్యలు, పోడు భూములు చిక్కులు వంటివన్నీంటిని ప్రజల్లోకి తీసుకువెళ్లాలని కాంగ్రెస్​భావిస్తున్నది.

మద్దతు లభిస్తుందనే ఆశ..?

రాష్ట్ర వ్యాప్తంగా రైతులంతా ప్రస్తుతం బీఆర్ఎస్​వైపు ఉన్నారనే ప్రచారం జోరుగా కొనసాగుతోంది. అయితే రుణమాఫీతో ఆ వర్గాన్ని తమ వైపునకు తిప్పుకోవాలని కాంగ్రెస్​ప్రయత్నిస్తోన్నది. గతంలో లక్ష రూపాయలు రుణమాఫీ చేస్తామని బీఆర్‌ఎస్​పార్టీ ఎన్నికల సమయంలో ప్రకటించింది. కానీ ఇప్పటి వరకు దాన్ని ఇంప్లిమెంట్ చేయలేదు. దీన్ని రైతు రుణమాఫీ చేసి ఆ వర్గాన్ని తమవైపు తిప్పుకోవాలని చూస్తోంది.

ఇవి కూడా చదవండి: ఉచిత ఎరువుల హామీకి ఆరేండ్లు కంప్లీట్! దేశం ఆగమయ్యేది ఎప్పుడు?