బ్రేకింగ్: టీ-కాంగ్రెస్‌కు బిగ్ షాక్.. కీలక నేత రాజీనామా

దిశ, వెబ్‌డెస్క్: అభ్యర్థుల సెకండ్ లిస్ట్ ప్రకటనతో టీ- కాంగ్రెస్‌లో అసంతృప్తి సెగలు భగ్గుమంటున్నాయి. టికెట్ ఆశించి భంగపడ్డ నేతలు తీవ్ర అసంతృప్తి వ్యక్తం చేస్తున్నారు. మొదటి నుండి గ్రౌండ్‌లో ఉండి పార్టీని, కార్యకర్తలను కాపాడుకుంటూ వస్తున్న తమను కాదని.. పారాచూట్ నేతలకు టికెట్లు ఇచ్చారని మండిపడుతున్నారు. టికెట్ దక్కవపోవడంతో తీవ్ర నిరాశకు గురైన కొందరు అసంతృప్తి నేతలు రాజీనామా చేసే రెబల్‌గా బరిలోకి దిగుతామని ఇప్పటికే ప్రకటించగా.. మరికొందరు హస్తాన్ని వీడేందుకు సిద్ధమవుతున్నారు.

ఈ నేపథ్యంలో టీ- కాంగ్రెస్‌కు మరో బిగ్ షాక్ తగిలింది. కాంగ్రెస్ పార్టీకి మైనార్టీ విభాగం చైర్మన్ అబ్ధుల్లా సోహెల్ రాజీనామా చేస్తున్నట్లు ప్రకటించారు. మైనార్టీ చైర్మన్ పదవితో పాటు కాంగ్రెస్ పార్టీ ప్రాథమిక సభ్యత్వానికి రాజీనామా చేస్తున్నట్లు సోహెల్ తెలిపారు. వాస్తవ కాంగ్రెస్ పార్టీని టీపీసీసీ చీఫ్ రేవంత్ రెడ్డి చంపేశారని సంచలన ఆరోపణలు చేశారు. 34 ఏళ్ల పాటు కాంగ్రెస్‌కు సేవలందించి.. ఇవాళ బాధతో పార్టీకి రాజీనామా చేస్తున్నానని ఆయన ఆవేదన వ్యక్తం చేశారు.