తెలుగు రాష్ట్ర రాజకీయాల్లో ‘రేర్’ సీన్.. చంద్రబాబుకు మాజీ సీఎం KCR శుభాకాంక్షలు

దిశ, వెబ్‌డెస్క్: ఆంధ్రప్రదేశ్‌లో టీడీపీ, జనసేన, బీజేపీ కూటమి కనివీని ఎరుగని విజయం అందుకుంది. ఆంధ్రప్రదేశ్ పొలిటికల్ హిస్టరీలోనే ఇంతవరకు ఏ పార్టీ సాధించని ఘన విజయం సాధించి.. రాష్ట్రంలో ప్రభుత్వ ఏర్పాటుకు సిద్ధమవుతోంది. ఎన్నికల్లో కూటమి ఘన విజయం సాధించడంతో టీడీపీ చీఫ్ చంద్రబాబు, జనసేన అధినేత పవన్ కల్యాణ్‌కు పలువురు సినీ, రాజకీయ ప్రముఖులు శుభాకాంక్షలు తెలుపుతున్నారు. ఈ క్రమంలోనే చంద్రబాబు, పవన్ కల్యాణ్‌కు బీఆర్ఎస్ అధినేత, తెలంగాణ మాజీ సీఎం కేసీఆర్ అభినందనలు తెలిపారు. ఆంధ్రప్రదేశ్ అసెంబ్లీ ఎన్నికల్లో ఘనవిజయం సాధించి, ప్రభుత్వాన్ని ఏర్పాటు చేయబోతున్న చంద్రబాబు నాయుడు, జనసేన అధినేత పవన్ కళ్యాణ్‌లకు శుభాకాంక్షలు అని కేసీఆర్ స్పెషల్ విసెస్ తెలిపారు.

ప్రజల మద్దతుతో కూటమి విజయం సాధించిందని, పాలనలోనూ వారి విశ్వాసం పొందాలని సూచించారు. ఈ మేరకు కేసీఆర్ మంగళవారం ఓ ప్రకటన విడుదల చేశారు. అయితే, ఏపీ ఫలితాల విడుదలకు రెండు రోజులు ముందు కూడా ఏపీలో మరోసారి జగనే గెలుస్తారని కేసీఆర్ ధీమా వ్యక్తం చేశారు. కానీ ఎన్నికల్లో వైసీపీ ఘోర పరాజయంతో కేసీఆర్ అంచనా తప్పింది. మరోవైపు అసెంబ్లీ, పార్లమెంట్ ఎన్నికల్లో ఘన విజయం సాధించిన చంద్రబాబు, పవన్ కల్యాణ్‌కు తెలంగాణ సీఎం రేవంత్ రెడ్డి సైతం శుభాకాంక్షలు తెలిపారు. రెండు తెలుగు రాష్ట్రాల మధ్య సంబంధాలు మంచి కొనసాగాలని ఈ సందర్భంగా రేవంత్ రెడ్డి ఆశించారు.