సీమాంధ్ర విద్యాసంస్థలతో ప్రభుత్వం కుమ్మక్కు.. SSC బోర్డును ముట్టడించిన బీఆర్ఎస్‌వీ

దిశ, తెలంగాణ బ్యూరో: సీమాంధ్ర కార్పొరేట్ విద్యాసంస్థలతో ప్రభుత్వం కుమ్మక్కు అయిందని బీఆర్ఎస్‌వీ నాయకులు ఆరోపించారు. రాష్ట్రంలో పదో తరగతి ప్రశ్నపత్రాలు లీక్ అవ్వడాన్ని నిరసిస్తూ బీఆర్ఎస్‌వీ రాష్ట్ర అధ్యక్షుడు గెల్లు శ్రీనివాస్ యాదవ్ ఆధ్వర్యంలో ఎస్సెస్సీ బోర్డును ముట్టడించారు. ఈ సందర్భంగా మాట్లాడుతూ.. పదో తరగతి ప్రశ్నపత్రాలు రేవంత్‌రెడ్డి ప్రభుత్వం అమ్ముకుందన్నారు. విద్యాశాఖ తన ఉద్దే ఉంచుకున్న ముఖ్యమంత్రి పరీక్షలకు ముందు విద్యాశాఖపై రివ్యూ నిర్వహించలేదన్నారు. అందుకే నకిరేకల్, మంచిర్యాల, వికారాబాద్, జుక్కల్‌లో పేపర్ లీక్ అయిందన్నారు. పేపర్ లీకేజీలకు బాధ్యత వహిస్తూ విద్యాశాఖ బాధ్యులైన సీఎం రేవంత్‌రెడ్డి వెంటనే రాజీనామా చేయాలని డిమాండ్ చేశారు. రాష్ట్రంలో ఇప్పటివరకు నాలుగు పరీక్షలు నిర్వహిస్తే నాలుగు ప్రశ్నపత్రాలు లీక్ అవ్వడం చూస్తుంటే విద్యాశాఖ ఎంత నిర్లక్ష్యంగా ఉందో అర్థమవుతుందన్నారు.

కార్పొరేట్ పాఠశాలలతో కుమ్మక్కై కాంగ్రెస్ ఎమ్మెల్యేలే లీకులకు పాల్పడటం సిగ్గుచేటన్నారు. పరీక్షలు సరిగ్గా నిర్వహించమని కోరితే రేవంత్‌రెడ్డి డైరెక్షన్లో కేటీఆర్‌పై నకిరేకల్‌లో అక్రమ కేసు పెట్టారని పేర్కొన్నారు. ముఖ్యమంత్రి పేషి నుండి ఆర్డర్ రాగానే సెకండ్లలో కేసులు నమోదు చేస్తున్నారని, పేపర్ లీకేజీ కేసులో అసలు నిందితులను తప్పించారని ఆరోపించారు. ఇప్పటికైనా రేవంత్ రెడ్డి చిల్లర వేషాలు మానుకోవాలని డిమాండ్ చేశారు. ఈ కార్యక్రమంలో ఉపాధ్యక్షులు తుంగ బాలు, కడారి స్వామి యాదవ్, చటారి దశరథ్, కాటం శివ, నర్సింగ్, శ్రీను నాయక్, మిద్దె సురేష్, శ్రీకాంత్ ముదిరాజ్, నాగేందర్ రావు, కల్వ నితీష్, సాయి గౌడ్, రాకేష్, రెహమాత్ తదితర విద్యార్థి నాయకులు పాల్గొన్నారు.