పల్లె మెరిసింది.. జనం మురిసిండ్రు..!!

దిశ, కుబీర్ : రాత్రి ప్రశాంతంగా నిద్రపోయిన ఈ గ్రామ జనాలకు, తెల్లవారేసరికి ఎటుచూసినా మురికి కాలువల శుభ్రం, పరిసరాల పరిశుభ్రత, బ్లీచింగ్ పౌడర్ చల్లడం, రోడ్డు పక్కన పెరిగిన పిచ్చి మొక్కలు తొలగించడం, రోజుకు భిన్నంగా జరుగుతున్న పనులను చూసి ఆశ్చర్యపోయారు. పల్లె మెరిసింది.. జనం మురిసిన్రు రోజు ఇలా ఉంటే ఎంత బాగుండు అనుకున్నారు. ఇంతకు ఈరోజు ఇలా ఎందుకు జరిగింది అనుకుంటున్నారా..

కుబీరు మండలంలోని వర్ని గ్రామానికి గురువారం ఉదయం కలెక్టర్ వస్తున్నారన్న సంగతి అధికారులకు తెలిసింది. ఉదయం తెలవడంతో అధికారులు ఆగ మేఘాల మీద, పల్లె మెరిసే విధంగా తీర్చిదిద్దారు. గ్రామాలో పరిసరాలను పరిశుభ్రం చేశారు. గ్రామంలోని పాఠశాల భవనం, అంగన్వాడి కేంద్రం, పంచాయతీ కార్యాలయం పరిసరాళ పరిశుభ్రతతో మురిపించింది. మండల స్థాయి అధికారులు చేరుకొని గ్రామంలో హడావిడి చేశారు. రోజు చెబితే కానీ జరగని పనులు ఈరోజు గంటల వ్యవధిలో పూర్తి కావడంతో గ్రామస్తులు సంబరపడ్డారు.

కలెక్టర్ రావడం లేదన్న సంగతి తెలవగానే అధికారులు ఊపిరి పీల్చుకున్నారు. ఇప్పటివరకు పరిగెత్తించిన పనులన్నీ నత్తకు నడక నేర్పినచందంగా నిలిచిపోయాయి. అధికారుల వెళ్లిపోయారు పనులు నిలిచిపోయాయి, గ్రామస్థులు నిరాశపడ్డారు. మండలానికి కలెక్టర్ రాక ముచ్చటగా మూడోసారి వాయిదా పడింది. కలెక్టర్ సార్ ఒకసారి ఎవరికీ చెప్పా పెట్టకుండా వస్తే గ్రామాల పరిస్థితి ఏ విధంగా ఉంటుందో తెలుస్తుందని గ్రామస్తులు చర్చించుకోవడం కనిపించింది.