Mancherial News : హాజీపూర్ లో పెద్దపులి కలకలం

దిశ, వెబ్ డెస్క్ : మంచిర్యాల జిల్లాలో పెద్దపులి సంచారం(Tiger migration) కలకలం రేపుతోంది. జిల్లాలోని హాజీపూర్ మండలంలోని ధర్మారం, టీకనపల్లి గ్రామాల సరిహద్దుల్లో పెద్ద పులి సంచరించినట్టు అటవీశాఖ అధికారులు గుర్తించారు. మంగళవారం బుగ్గగుట్ట ప్రాంతంలో గొర్రెల మందపై దాడి చేసి మూడు గొర్లను చంపి తిన్నట్టు కాపారులు తెలిపారు. పులి దాడి ఘటన గురించి తెలుసుకున్న గ్రామస్తులు అటవీశాఖ అధికారుల(Forest Officers)కు సమాచారం అందించారు. ఘటనా స్థలానికి చేరుకున్న అధికారులు పాదముద్రల ఆధారంగా పెద్దపులి సంచరిస్తున్నట్టు నిర్ధారించారు. గ్రామస్తులు అటవీ ప్రాంతంలోకి వెళ్లకూడదని, అడవి సమీపంలో పశువులను మేపకూడదని చుట్టు పక్కల గ్రామాల ప్రజలకు అటవీశాఖ ఉన్నతాధికారులు హెచ్చరికలు జారీచేశారు.