Harish Rao: సచివాలయం గేటు మార్పునకు 4 కోట్లా : సీఎంపై హరీష్ రావు మండిపాటు

దిశ, తెలంగాణ బ్యూరో : వాస్తు దోషం ఉందని సచివాలయం(Secretariat) ఒక్క గేట్ మార్పు చేయటానికి రూ.4 కోట్లు ఖర్చు పెడుతున్నారని ప్రభుత్వంపై మాజీ మంత్రి, ఎమ్మెల్యే హరీష్ రావు(Harish Rao's) ఫైర్ అయ్యారు. ఇది కదా అసలు సిసలైన కాంగ్రెస్ మార్కు ‘మార్పు’ అని గురువారం ఎక్స్‌ వేదికగా స్పందించారు. సచివాలయంలో సీఎం రేవంత్‌ రెడ్డి చేపడుతున్న వాస్తు మార్పులపై మండిపడ్డారు.

నాడు కేసీఆర్‌ ప్రభుత్వం ఎంతో ప్రతిష్టాత్మకంగా గ్రీన్ టెక్నాలజీ, ఫైర్ సేఫ్టీ నార్మ్స్ తో దేశానికే తలమానికమైన కొత్త సెక్రటేరియట్ నిర్మిస్తే వాస్తు పిచ్చని నాడు రేవంత్ రెడ్డి గాయ్ గాయ్ గత్తర గత్తర చేశాడన్నారు. ఇప్పుడు ముఖ్యమంత్రిగా సెక్రటేరియట్‌కు పూటకో మార్పు చేస్తున్నాడని ఎద్దేవా చేశారు. ఇకనైనా పాలనపై దృష్టి పెట్టి ప్రజలకు మేలు జరిగే పనులు చేపట్టాలని హితవు పలికారు.