ఆర్టీసీ బస్సు వల్ల విద్యార్థులకు అవస్థలు.. రాత్రవుతున్నా అక్కడే..

దిశ, మహా ముత్తారం: జయశంకర్ భూపాలపల్లి జిల్లా మహాముత్తారం మండలంలోని దొబ్బలపాడు గ్రామం వద్ద ఉన్న మోడల్ పాఠశాలల విద్యార్థులు రాత్రివేళ బస్సు కోసం ఎదురు చూస్తూ అక్కడే చిక్కుకున్నారు. గురువారం విద్యార్థులను తీసుకెళ్లే ఆర్టీసీ బస్సు రాకపోవడంతో రాత్రి ఏడు గంటల వరకు పాఠశాల వద్ద ఎదురు చూస్తూ ఉండడంతో విద్యార్థుల తల్లిదండ్రులు ఆందోళన వ్యక్తం చేశారు. మోడల్ పాఠశాల వద్ద పరిసర ప్రాంతాల్లో అడవులు ఉండడంతో ఏం జరుగుతదోననే విద్యార్థులు భయాందోళన వ్యక్తం చేస్తున్నారు. కొందరు విద్యార్థులు లిఫ్ట్ తీసుకొని తమ గమ్యస్థానాలకు వెళ్లిపోగా, వివిధ గ్రామాలకు చెందిన సుమారు 40 మంది విద్యార్థులు పాఠశాల వద్ద రాత్రి బస్ కోసం ఎదురుచూస్తున్నారు. ఆర్టీసీ బస్సు సమయ పాలనకు రాకపోవడంతో విద్యార్థులు ఇబ్బందులు పడుతున్నారు. సమయపాలన పాటించని ఆర్టీసీ బస్సుల విషయంలో సంబంధిత అధికారులపై చర్యలు తీసుకోవాలని ఆర్టీసీ అధికారులకు, ప్రజాప్రతినిధులకు విద్యార్థులు విజ్ఞప్తి చేస్తున్నారు.