డబ్ల్యూపీఎల్ వేలం తేదీ ఖరారు?.. ఎప్పుడో తెలుసా?

దిశ, స్పోర్ట్స్ : ఇటీవలే ఐపీఎల్ వేలం ముగిసిన విషయం తెలిసిందే. ఈ క్రమంలోనే బీసీసీఐ ఉమెన్స్ ప్రీమియర్ లీగ్(డబ్ల్యూపీఎల్) వచ్చే సీజన్‌కు సంబంధించి వేలంపై దృష్టి సారించింది. ఇప్పటికే ఐదు ఫ్రాంచైజీలు తాము అంటిపెట్టుకున్న ఆటగాళ్ల జాబితాను రిలీజ్ చేశాయి. ఇక, మిగిలింది వేలం మాత్రమే. వేలం తేదీ, వేదిక కూడా ఖరారైనట్టు తెలుస్తోంది. వచ్చే నెల 15వ తేదీన బెంగళూరు వేదికగా వేలం జరగనున్నట్టు జాతీయ మీడియా వెల్లడించింది. దీనిపై అధికారిక ప్రకటన రావాల్సి ఉంది. వేలంలోకి గుజరాత్ జెయింట్స్ రూ.4.4 కోట్లతో అత్యధిక మొత్తంలో రానుండగా.. ఢిల్లీ క్యాపివటల్స్ వద్ద అత్యల్పంగా రూ. 2.5 కోట్లు ఉన్నాయి. డబ్ల్యూపీఎల్-2025 షెడ్యూల్‌పై ఇంకా రిలీజ్ కాలేదు. అయితే, ఐపీఎల్ కంటే ముందు ఫిబ్రవరి, మార్చిలో నిర్వహించే అవకాశం ఉంది.