అయోధ్యలో విరాట్ కోహ్లీ డూప్.. సెల్ఫీల కోసం ఎగబడిన ఫ్యాన్స్

దిశ, వెబ్‌డెస్క్: నిన్న అయోధ్యలో బాల రాముడి విగ్రహ ప్రాణప్రతిష్ట అట్టహాసంగా జరిగింది. ఈ కార్యక్రమానికి దేశవ్యాప్తంగా ఉన్న సెలబ్రేటీలు, ప్రముఖులు, రాజకీయ నాయకులు, ప్రముఖ క్రికెటర్లు పాల్గొన్నారు. ఈ క్రమంలోనే భారత స్టార్ క్రికెటర్ విరాట్ కోహ్లీ.. తన భార్య అనుష్క శర్మతో కలిసి ఈ కార్యక్రమంలో పాల్గోని వెళ్లిపోయాడు. అయితే ఇక్కడే ఓ అనూహ్య సంఘటన చోటు చేసుకుంది. అచ్చుగుద్దినట్లు కోహ్లీలా ఉండే అతని అభిమాని కూడా ఈ కార్యక్రమానికి వచ్చాడు. రాత్రి వరకు అక్కడే ఉన్నాడు.

ఆ సమయంలో అతన్ని చూసిన కోహ్లీ అభిమానులు సెల్ఫీల కోసం ఎగబడ్డారు. కొందరైతే అతన్ని చూసి నిజమైన కోహ్లీ అనుకోని దూరం నుంచి పరిగెత్తుకుంటూ వచ్చారు. ఒక్కసారిగా కోహ్లీ డూప్ తో సెల్ఫీల కోసం ఇక్కడ ఉన్న వాళ్ళు ఎగబడటంతో పోలీస్ సిబ్బంది అతనికి రక్షణ కల్పించారు. ఈ ఘటనకు సంబంధించిన వీడియో ఒకటి ప్రస్తుతం సోషల్ మీడియాలో వైరల్‌గా మారింది. ఆ వీడియోలో ఇండియా జర్సీ వేసుకున్న వ్యక్తి అచ్చం కోహ్లీలా కనిపించాడు. దీంతో అతనితో సెల్ఫీల కోసం ఫ్యాన్స్ ఎగబడటం ఆ వీడియోలో కనిపించింది.